N.Nazarbaevtyń atyna QHA Keńesiniń kezekten tys prezıdenttik saılaý ótkizý jónindegi bastamasyn qoldaǵan hattar men jedelhattar kelip túsýde
Atap aıtsaq, «Nur Otan» partııasynyń málimdemesinde QHA Keńesiniń bastamasy el múddesine jaýap beretin durys qadam ekeni aıtylǵan.
«Bizdiń halqymyz el tarıhynyń eń sheshýshi sátterinde bolashaq urpaq úshin danalyq tanyta otyryp, birliktiń, óz Kóshbasshysynyń aınalasyna toptasýdyń bıik deńgeıin kórsetti. Bul «Qazaqstan-2050» uzaqmerzimdi Strategııasy men «Máńgilik El» ıdeıasyn júzege asyrýdy qamtamasyz ete otyryp, budan da kúshti, budan da uıymshyl bolýdyń tarıhı múmkindigi», - delingen hatta.
Qazaqstan qarjygerleri qaýymdastyǵynyń músheleri saılaý ótkizý ekonomıkalyq jáne aqsha-nesıelik saıasattyń sabaqtastyǵyn qamtamasyz etip, ınvestorlarǵa senimdilik beretinin, eldegi iskerlik belsendilikti jandandyratynyn atap ótken.
«Eldiń qarjy uıymdarynyń basshylary men qyzmetkerleri qoǵamymyzdyń ekonomıkalyq damýdyń meılinshe joǵary satysyna qaraı júıeli qozǵalysyn qoldaý isine óz úlesterin qosý úshin qoldan kelgenniń bárin jasaýǵa daıyn jáne usynylǵan saılaýdyń mańyzdylyǵyn osy joldaǵy qajetti kezeń retinde tolyq túsinedi», - dep jazady avtorlar.
Túrli kásiporyndardyń jumysshylary da hat joldap otyr.
«Bolat Nurjanov atyndaǵy Ekibastuz GRES-1» JShS jumysshylary eldi órkendetý úshin alǵa qoıylǵan mindetterdi júzege asyrý isine qatysýǵa daıyn ekendikterin bildiredi.
«Biz elektr energııasyn eldiń barlyq óńirlerine jáne shetelge baǵyttaımyz. Bizdiń mindetimiz - ár úıde kúndiz de, túnde de elektrdiń bolýy. Bizdiń tutynýshylarymyz turaqtylyqty joǵary baǵalaıdy, al biz turaqtylyqty tek Sizben baılanystyramyz. Biz «Qazaqstan-2050» Strategııasyn jalǵastyrýdy, ishki saıası turaqtylyqty nyǵaıtýdy, ári qaraı damýdy jaqtaımyz. Sondyqtan Sizden Prezıdent saılaýyn 2015 jyly ótkizý bastamasyn qoldaýdy suraımyz», - dep jazady avtorlar.
Jambyl oblysyndaǵy «Qazfosfat» JShS hatynda alty myńdyq eńbek ujymynyń negizgi tilegi - Nursultan Nazarbaevqa senetinin rastaý ekeni aıtylǵan.
«Dál búgin birlikti, kelisim men turaqtylyqty nyǵaıtý mańyzdy, sondyqtan biz Sizdi el Prezıdenti laýazymyna laıyqty kandıdat sanaımyz. Qazirgi baq-berekemizdi jáne bolashaǵymyzdy tek Sizben baılanystyramyz», - delingen hatta.
«Qazaqmys» Korporatsııasy» JShS eńbek ujymdarynyń 9 myńnan astam múshesi - kenshiler, metallýrgtar, ken baıytý kásiporyndarynyń jumysshylary da elimizdiń odan ári qarqyndy damýyn qamtamasyz etý úshin Qazaqstan Prezıdentine jańa senim mandatyn berý qajet ekenin atap ótken.
«Biz búginde basqa balama joq ekenine senimdimiz. Óıtkeni naq Sizdiń basshylyǵyńyzben elimiz óz damýynda eleýli tabystarǵa jetti. Siz respýblıkany aýqymdy jańǵyrtý jáne ony álemniń meılinshe básekege qabiletti 30 eliniń qataryna qosý jolyndaǵy jumysty Qazaqstan halqymen birge jalǵastyrýǵa tıissiz dep sanaımyz. Barlyq qazaqstandyqtardy, eńbekshilerdi, turaqtylyqty jáne egemen Qazaqstannyń júıeli damýyn qymbat sanaıtyn barshany Prezıdent saılaýyn merziminen buryn ótkizýdi qoldaýǵa shaqyramyz», - delingen hatta.
Aqmola oblysyndaǵy «Rodına» agrofırmasy» JShS ujymynyń músheleri óz hattarynda jahandyq ekonomıkalyq daǵdarys pen álemdegi geosaıası turaqsyzdyqtyń beleń alýy jaǵdaıynda Qazaqstan qýatty ári ilkimdi kóshbasshyny qajet etetinine toqtalǵan.
«Qoǵamda eldiń ári qaraıǵy áleýmettik-ekonomıkalyq tabysy kóbine-kóp Sizdiń Memleket basshysy, Ult kóshbasshysy retindegi rólińiz arqyly ǵana múmkin bolatyny týraly aıqyn túsinik bar. Sondyqtan, otandastarymyzdyń bastamasyn tolyq qoldaı otyryp, Sizden júrek qalaýymen jasalǵan halyq tańdaýyna qulaq asýdy suraımyz», - delingen hatta.
Almaty oblysyndaǵy «Hılnıchenko jáne K» komandıttik seriktestik jumysshylary Memleket basshysynyń osyndaı turaqsyz ýaqytta strategııalyq sıpatta shuǵyl sheshimder qabyldaı bilýi - dendep kele jatqan syrtqy syn-qaterlerdi tabysty eńserý kepili ekenin atap ótken.
«Búgin biz jáne el taǵdyryna beı-jaı qaraı almaıtyn barlyq qazaqstandyqtar, jaýapkershilikpen aıta alamyz: Qazaqstanda Sizge saıası balama joq. Siz sekildi Prezıdentpen bizge bári jeńil, biz daǵdarys kezeńiniń barlyq qıyndyqtaryn eńseremiz. Óıtkeni olar ótpeli ǵoı, al bizdiń Qazaqstan máńgilik bolsyn», - dep jazady avtorlar.
Qazaqstan halqy Assambleıasynyń merziminen buryn saılaý ótkizý týraly bastamasyn maquldaǵan azamattardyń qatarynda Memleket basshysyna qoldaý kórsetý týraly pikir bildirgen kóptegen jas urpaq ókilderi bar.
Ál-Farabı atyndaǵy Qazaq ulttyq ýnıversıtetiniń stýdentteri Memleket basshysynyń Joldaýyn jáne «Qazaqstan-2050» Strategııasyn tabysty júzege asyrý úshin kúsh jumyldyrýdyń mańyzdylyǵyn atap ótken.
«Osyǵan baılanysty keıinge qaldyrmaı saılaý ótkizý mańyzdy dep sanaımyz jáne Qazaqstan halqy Assambleıasynyń bastamasyna tolyq qoldaý kórsetemiz», - delingen hatta.
І.Jansúgirov atyndaǵy Jetisý memlekettik ýnıversıtetiniń stýdentteri Elbasynyń basshylyǵymen elimiz táýelsizdik jyldarynda túrli qıyndyqtardan sátti ótkenine toqtalǵan.
«Biz aldaǵy ýaqytta da Memleket basshysymen birge Qazaqstandy álemniń damyǵan 30 eliniń qataryna qosý jónindegi maqsatqa qaraı ilgeriletýdi qalaımyz. Sondyqtan Sizden kezekten tys prezıdent saılaýyn ótkizýge kelisim berýińizdi suraımyz», - dep jazady avtorlar.
Qazaqstan halqy Assambleıasy Keńesiniń el Prezıdentiniń saılaýyn merziminen buryn ótkizý jónindegi bastamasyna baılanysty hattar Memleket basshysynyń atyna tolassyz kelip túsýde.
