N.Nazarbaevqa jurtshylyq tarapynan túsken saýaldardyń sany 11 myńǵa jetti
ANA. Qarashanyń 6-sy. QazAqparat /Arman Asqarov/ - Elbasy Nursultan Nazarbaevtyń halyqpen tikeleı jeli arqyly tildesýine oraı Astanada jumys istep jatqan Baılanys ortalyǵyna búgin,
qarashanyń 6-na deıin qazaqstandyqtardyń tarapynan túsken saýaldardyń sany 11 myńǵa jýyqtady, dep habarlaıdy QazAqparat.
Búginde halyqty jıi mazalap júrgen suraqtardyń basym bóligi áleýmettik qorǵaý máselesin qamtyp otyr. Baılanys ortalyǵyna habarlasyp jatqan azamattar Prezıdentten zeınetaqy mólsherin belgileý máselesin sheship, zeınetkerlikke shyǵý jasyn áıelder úshin 53-55-ke jáne er adamdar úshin 60-jasqa deıin tómendetýdi suraıdy. Sebebi elýden asqan zeınet jastaǵy adamdardyń kóbisin jumysqa almaıdy. Al qyzmette júrgenderdi jumystan bosatýǵa tyrysady. Osynyń nátıjesinde elimizdegi egde kisilerdiń basym bóligi jumyssyz qalyp, zeınetaqyǵa shyǵý merzimin 8-10 jylǵa deıin kútip otyrýǵa májbúr. «Osy ýaqyt aralyǵynda biz jumysqa ornalasa almaı, qıyn jaǵdaıǵa tap bolamyz. Bizben qatarlas azamattardyń kóbisi zeınetkerlikke jete almaı jatady», deıdi olar. Osy salada zeınetkerlikke shyqqan áskerı azamattardyń da qordalanyp qalǵan problemalary barshylyq.
Esterińizge sala keteıik, 2009 jyly qarashanyń 13-i kúni Qazaqstan Respýblıkasynyń Prezıdenti N.Nazarbaev «Qazaqstan», «Habar», «Astana qalalyq teledıdary» telearnalary jáne «Qazaq radıosy», «Astana radıosy» boıynsha ótetin tikeleı efırde azamattardyń teleefır, telefon ınternet jáne SMS habarlamalary arqyly túsken suraqtaryna jaýap beretin bolady. Suraqtardy respýblıka boıynsha +7 (7172) 555-777 telefony men KCell, Beeline, Neo, Altel uıaly baılanysyn paıdalanýshylar úshin SMS habarlamalary arqyly 1111 nómirine jiberýge bolady. Sondaı-aq
www.line.gov.kz saıtynyń tıisti tarmaǵyn paıdalana otyryp, beınesuraqty joldaýǵa bolady. Al jazbasha saýaldy vopros@akorda.kz elektrondyq mekenjaıyna jiberýge múmkindik bar.
Aıta keteıik, «Qazaqtelekom» usynǵan baılanys tegin bolsa, uıaly telefondarǵa arnaıy tólemder qarastyrylǵan. «Tikeleı jeli» kezinde Elbasynyń nazaryna ilikpeı qalǵan saýaldarǵa tıisti memlekettik organdar bir aıdyń kóleminde jaýap ázirlep, saıtqa ornalastyratyn bolady. Al Interneti joq aýyldyq jerler úshin ákimdikter janynan qoǵamdyq qabyldaý bólimderi ashylǵan.
Baılanys ortalyǵynyń habarlaýynsha, halyq tarapynan túsip jatqan saýaldardyń ishinde qaıtalanatyn máseleler jáne test úlgisindegi suraqtar kóp bolǵandyqtan, keıbir saýaldar qaıtarylyp jatyr.
