N.Nazarbaev Joldaý kezinde Almaty oblysy ákiminiń jumysyna oń baǵa berdi
ASTANA. QazAqparat - Búgin Táýelsizdik saraıynda Qazaqstan halqyna kezekti Joldaýyn jarııalaǵan Memleket basshysy Nursultan Nazarbaev aımaq basshylaryna memlekettik-jekemenshik áriptestikti damytý sharalaryna kóńil bólýdi tapsyrdy. Bul rette, Prezıdent memlekettik-jekemenshik áriptestik tetigin tıimdi paıdalanyp otyrǵan Almaty oblysynyń ákimi Amandyq Batalovtyń jumysyna jaqsy baǵasyn berdi.
«Aımaqtyq (salalyq) damýǵa arnalǵan baǵdarlamalar men ındýstrııalyq damýǵa baǵyttalǵan baǵdarlamanyń shyǵyndaryn qaıta qarasa jón bolar edi. Memlekettik shyǵyn men sýbsıdııalardyń mólsherin de qaıta tekserý artyq bolmaıdy. Sebebi, qazir qatarynan birneshe sala tek qana memlekettiń esebinen kún kórip otyr deýge bolady. Biraq, osylaı bola tura, mysaly, aýyl sharýashylyǵy ónimin óndirýshi kásiporyndardyń teń jartysy «QazAgro» korporatsııasynyń qoldaý sharalaryna qol jetkize almaı otyr. Bıýdjet shyǵynyn azaıtý úshin memlekettik-jekemenshik áriptestik tetikterin belsendi ári tıimdi qoldana bastaý qajet. Memlekettik-jekemenshik áriptestik degenniń ne ekenin de jaqsylap túsindirý kerek áli de. Jýyrda men Almaty oblysynyń ákimimen áńgimelesip, Almaty qalasyna bardym. Sonda, memlekettik-jekemenshik áriptestiktiń nátıjesi qandaı bolatynyn kórdim: memleket kásipkerge jer beredi, jaryǵyn, ystyq-sýyq sýyn tartyp beredi, bylaısha aıtqanda, bastapqy jaǵdaıyn jasap beredi. Bul - memlekettiń qatysýy. Al, kásipker sol jerdegi nysannyń qurylysyn moınyna alady. Osylaısha, birneshe balabaqsha, basqa da áleýmettik nysandar salynǵan eken. Almaty oblysynyń ákimi A.Batalov osy memlekettik-jekemenshik áriptestikti keń kólemde aınalymǵa engizgen. Buny aınalymǵa engizý úshin de ákimge jumys kerek. Jumys istemeı, jata berse, memleketten aqsha surap, kabınetten kabınetke júgirse, túk paıda bolmaıdy. Kim jumys istese, sol nátıje kórsete alady. Sondyqtan, jumys istegen ákim óz aımaǵyna ábden baıyp ketken, sol óńirden shyqqan azamattardy da tartady, basqa da sharalardy qolǵa alady», - dedi Elbasy.
Bul rette, N.Nazarbaev jekemenshik ınvestorlardy joldardyń, gaz qubyrlarynyń, mektep pen ózge de áleýmettik nysandardyń qurylysyna ǵana emes, olardyń tehnıkalyq qyzmet kórsetýine de tartý kerektigine toqtaldy.
«Bıýdjettik shyǵyndy ońtaılandyrýdan túsken qarjynyń barlyǵyn eń birinshi kezekte halyqqa shyn paıdasyn tıgizetin jobalarǵa jumsaý kerek»,-dep qadap aıtty Memleket basshysy.
