N.Nazarbaev Úkimetke terrorızmge qarsy is-qımyl zań jobasyn ázirleý úshin 2 aı ýaqyt berdi

ASTANA. QazAqparat - Búgin Astanada ótken Qaýipsizdik keńesi otyrysy barysynda QR Prezıdenti Nursultan Nazarbaev el Úkimetine eki aıdyń ishinde lańkestik pen ekstremızmge qarsy is-qımyl, qarý-jaraq aınalymy, saqtaý ári satý, kóshi-qon salasyn retteý jáne dinı birlestikterge qatysty zańnamalyq bastamalar toptamasyn ázirleýdi tapsyrdy, dep habarlady Aqordanyń baspasóz qyzmetinen.

«Halyqaralyq lańkestik uıymdarǵa qatysýshy qazaqstandyq azamattarǵa qatysty jazalardy kúsheıtý sharalaryn qarastyrý qajet. Buǵan qosa, olardyń bizdiń memleketimizdiń múddesine satqyndyq jasap, is júzinde óz Otanyna qarsy soǵys jolyna túsetindigin eskergen jón. Sonymen qatar lańkestik qater týraly dabyldar boıynsha arnaıy jedel is-sharalardy ótkizý múmkinshiligin jeńildetý qajet. Zańnamalyq bastamalardyń osynaý toptamasyn aǵymdaǵy jyldyń zańnamalyq jumys josparyna qosý qajet», - dedi Memleket basshysy.