N.Nazarbaev Úkimet basshysyna densaýlyq saqtaý nysandaryn salýda oryn alyp otyrǵan bassyzdyqtardy anyqtaýdy tapsyrdy
ASTANA. 27 qańtar. QazAqparat /Marlan Jıembaı/ - Búgin Úkimet otyrysynda Memleket basshysy Nursultan Nazarbaev densaýlyq saqtaý nysandarynyń qurylysyn synǵa aldy.
Densaýlyq saqtaý nysandarynyń qurylysy máselelerin anyqtap alý qajettigin atap ótken Elbasy: «Ótken jyldary 100 mektep, 100 aýrýhana baǵdarlamasy aıasynda josparlanǵan 103 densaýlyq saqtaý nysanynyń tek 58-i ǵana salynǵan. Bul qurylystarǵa kim ákimshilik jasaıdy? Bulaı jumys istemeý kerek. Ákimder qaıda qarap otyr? Bul adamdardyń densaýlyǵy úshin, ári aldymen, senderdiń oryndaýǵa tıisti tapsyrmalaryń. Biz bul baǵdarlamany nelikten engizip, aqsha bóldik?»,-dedi.
Sonymen qatar N. Nazarbaev, 2011 jylǵy Qazaqstan halqyna arnalǵan Joldaýynda elimizde qosymsha 350 aýrýhana men ambýlatorııa salý mindetin júktegenin aıta kele, «Biraq jumsalǵan shyǵystar tek 7 nysan boıynsha ǵana. Onda nelikten biz osynshama nysan josparladyq?»,-dedi Prezıdent.
Bul rette N. Nazarbaev, osyndaı bassyzdyqtardyń oryn alyp otyrǵandyǵyn anyqtaýdy Úkimet basshysy Kárim Másimovke júktedi.
