N. Nazarbaev: Úkimet áleýmettik mindettemelerdi qarjylandyrýdy esh qysqartpaıdy
ASTANA. QazAqparat - Qandaı jaǵdaı oryn almasyn, Úkimet áleýmettik mindettemelerdi esh qysqartpaıdy. Búgin besinshi shaqyrylǵan Parlamenttiń tórtinshi sessııasyn ashylý barysynda sóz sóılegen QR Prezıdenti Nursultan Nazarbaev osylaı málimdedi.
«Tutqıyldan paıda bolatyn táýekelderdi, geosaıasattyń ózgerýin, sonymen birge týyndaıtyn jańa múmkindikterdi eskere otyryp, ekonomıkalyq saıasatty qalyptastyrýǵa tıispiz. Eń bastysy qol jetken damý deńgeıin saqtap qalý, óndiristik quldyrýdy boldyrmaý, jurtshylyqtyń áleýmettik kóńil-kúıin túsirýge jol bermeý mańyzdy. Bul ortalyq organdardyń ǵana emes, barlyq deńgeıdegi ákimdikterdiń mańyzdy mindeti bolmaq», - dedi Prezıdent.
Bul rette álemdik naryq jaǵdaıynda Qazaqstannyń eksporttyq taýarlaryna baǵanyń qubylyp turǵanyn eske sala kele, bunyń el bıýdjetine barynsha sezilip otyrǵanyn tilge tıek etti.
«Reseıge qatysty jáne Reseıdiń batysqa qarsy sanktsııalary da Qazaqstanǵa áser etpeı qoımaıdy. Biz ondaı qysymdardan aınalyp óte almaımyz. Degenmen, Úkimet búgingi kúni bul máselemen barynsha aınalysýda. Oryn alýy yqtımal oqıǵalardyń birneshe nusqasy, bizdiń «jaýaptarymyz» bolýy shart. Degenmen, Qazaqstan úshin «qorqynyshty» eshnárse joq, bizde ornyqtylyq bar, múmkindigimiz, tıisti rezervter jetkilikti. Úkimet ekonomıka damýynyń optımıstik jáne pessımıstik stsenarıılerin, eldiń ekonomıkalyq qaýipsizdigin qamtamasyz etetin tetikter ázirlep jatyr. Jalpy, damýdyń qandaı stsenarııi oryn almasyn, Úkimetke memlekettiń áleýmettik mindettemelerin qarjylandyrýdy esh qysqartpaý týraly tapsyrma júkteldi. Bul úshin, halyqtyń ornyqty ál-aýqatyn qamtamasyz etýde bizde qajetti resýrstar barshylyq», - dedi N. Nazarbaev.
