N.Nazarbaev TMD kóshbasshylarynyń beıresmı kezdesýiniń joǵary mıssııasyn atap ótti

MÁSKEÝ. QazAqparat - Qazaqstan Prezıdenti Nursultan Nazarbaev Máskeýde ótkizilip otyrǵan TMD elderi kóshbasshylarynyń beıresmı kezdesýiniń joǵary mıssııasyn atap óte kele Reseı Prezıdentine bastamashylyǵy jáne Uly Otan soǵysyndaǵy Jeńistiń 70 jyldyǵyna arnalǵan saltanatty sharalarǵa shaqyrǵandyǵy úshin alǵysyn bildirdi.

«Uly mereke - Jeńis kúniniń qarsańynda ótkizilip otyrǵan búgingi kezdesý ardagerler men tyl eńbekkerlerine, Uly Otan soǵysynda qaza tapqandarǵa kórsetilgen qurmet boldy. Biz Vladımır Vladımırovıch Pýtınge búgingi kezdesýge bastamashy bolyp, bul aıtýly datany merekeleýge qatysýǵa shaqyrǵany úshin rızashylyǵymyzdy bildiremiz», - dep atap ótti Memleket basshysy.

Elbasy Uly Otan soǵysyndaǵy natsıstik qaýip-qater men onyń bolýy múmkin saldary kezindegi keńes halqynyń birligi týraly eske saldy.

«Soǵystyń asa aýyr jyldarynda bizdiń halyqtarymyz natsıstik qaýip-qaterge birlese qarsy turdy. Negizgi aýyrtpashylyq bizdiń elderimizdiń ıyǵyna tústi. Bizdiń ákelerimiz ben atalarymyz jeńiske jetti. Eger olar bulaı jasamaǵanda, saıasat, ekonomıka qaı baǵytqa aýyp, bizdiń halyqtarymyz qaıda júretini belgisiz edi», - dedi QR Prezıdenti.