N.Nazarbaev Sırııadaǵy qaqtyǵysqa qatysýshy taraptardy soǵysty toqtatý ýaǵdalastyǵyn oryndaýǵa shaqyrdy

ASTANA. QazAqparat - Sırııadaǵy qaqtyǵysqa qatysýshy taraptar soǵysty toqtatý ýaǵdalastyǵyn oryndaýy qajet. Bul týraly búgin Aqordada Qazaqstanda tirkelgen sheteldik dıplomatııalyq mıssııalar basshylarymen kezdesý barysynda QR Prezıdenti Nursultan Nazarbaev aıtty.

«Búginde Taıaý Shyǵysta barsha álemniń taǵdyry sheshilip jatqandyǵy artyq aıtqandyq emes. Sırııadaǵy janjal óńirden tysqary aımaqqa da teris áser etedi. Bosqyndardyń mundaı tasqyny Ekinshi dúnıejúzilik soǵys kezinde de bolmaǵan. Halyqaralyq qoǵamdastyqtyń Islam memleketimen kúrestegi is-qımyldarynyń bytyrańqylyǵy lańkesterge tıimdi bolyp otyr. Sondyqtan da men Birikken Ulttar Uıymy aıasynda halyqaralyq terrorızm men ekstremızmge qarsy is-qımyldyń biryńǵaı jahandyq jelisin qurýdy usyndym. Eger elder bul kúreste birikpeıtin bolsa, menińshe, bizder tabysqa jete almaımyz. Biz Reseı men AQSh arasyndaǵy Sırııadaǵy soǵysty toqtatý týraly qol jetkizilgen ýaǵdalastyqty qoldaımyz. Barlyq qatysýshy taraptardy qol jetkizilgen ýaǵdaldastyqty tolyq oryndaýǵa shaqyramyz», - dedi QR Prezıdenti.

N.Nazarbaev ýaǵdalastyqty oryndaý óńirdiń uzaqmerzimdi saıası retke keltirilýin qamtamasyz etetindigine senim artty.