N.Nazarbaev pen V.Pýtınniń aýdarmashysy AQSh-ta «Jyl kásipqoıy» atandy
ASTANA. QazAqparat - Tehas shtatynyń Hıýston qalasynan Marıon Rıfkaınd tanymal Strathmore's Who's Who jelilik resýrsy nusqasy boıynsha aýyzsha jáne jazbasha aýdarma salasyndaǵy jetistikteri jáne kórnekti úlesi úshin «Jyl kásipqoıy» atandy, dep habarlady PR.com.
Marıon Rıfkaındtyń halyqaralyq kommýnıkatsııa, aýyzsha jáne jazbasha aýdarma salasynda 35 jyldan astam jumys tájirıbesi bar. Rıfkaınd hanym Universe Technical Translation Inc kompanııasynyń negizin qalaýshy, prezıdenti, qojaıyny jáne bas atqarýshy dırektory. Marıon Rıfkaınd Reseı Prezıdenti Vladımır Pýtınge, AQSh-tyń eks-Prezıdenti Djordj Býshqa, Qazaqstan Prezıdenti Nursultan Nazarbaevqa jáne Qytaı Halyq Respýblıkasynyń eks-Tóraǵasy Tszıan Tszemınge aýyzsha aýdarma qyzmetin kórsetti.
M.Rıfkaınd Londonda (Anglııa), Máskeýde (Reseı) jáne Bakýde (Ázerbaıjan) keńselerin ashty, Ol orys, frantsýz, nemis tilderinde sóıleıdi. Sonymen birge qazirgi kezde ol ıspan jáne ıvrıt tilderin úırenip júr. Bos ýaqytynda ol otbasylyq sharalarda bolǵandy unatady, tamaq jasaýdy, tennıste oınaýdy, velosıped tebýdi jaqsy kóredi. Sonymen birge Rıfkaınd pılatespen, ıogamen jáne bılermen aınalysady.
Eske sala keteıik, Strathmore's Who's Who jyl saıyn bıznes, óner, ǵylym, zań jáne saıasat salalaryndaǵy kórnekti adamdardyń jınaǵyn jarııalaıdy.
