N. Nazarbaev pen BUU Bas hatshysy EQYU memleket basshylarynyń sammıtin ótkizý taqyrybyn talqylady
áýirdiń 7-si. QazAqparat /Ernur Aqanbaı/ - Búgin Aqordada Qazaqstan Prezıdenti Nursultan Nazarbaev pen BUU Bas hatshysy Pan Gı Mýn Astana bastamashy bolǵan EQYU Memleket basshylarynyń sammıtin ótkizý máselesin talqylady,
dep habarlaıdy QazAqparat.
«Qazaqstannyń EQYU-ǵa tóraǵalyǵyna aıryqsha nazar aýdaryldy. Biz EQYU memleket basshylarynyń sammıtin ótkizý taqyrybyn talqyladyq. Men Pan Gı Mýn myrzaǵa EQYU-ǵa bizdiń tóraǵalyǵymyzdy qoldaǵany úshin alǵysymdy bildiremin», dedi búgin Aqordadaǵy kelissózderden keıingi brıfıngte N. Nazarbaev.
Elbasynyń aıtýynsha, kelissózder barysynda Qazaqstan men BUU ózara is-qımylynyń keń aýqymdy máseleleri talqylanǵan. Atap aıtqanda, halyqaralyq qaýipsizdiktiń jalpy jaǵdaıy, sondaı-aq ıadrolyq qarýsyzdaný úderisinde zor mańyzy bar birtaqatar sharalar talqylanǵan.
Osy oraıda N. Nazarbaev qarýsyzdaný jáne ıadrolyq qarý-jaraqty taratpaý isine Qazaqstannyń qosqan úlesin ádiletti joǵary baǵalaǵany úshin alǵysyn bildirdi. «Biz erteń Pragada AQSh jáne Reseı prezıdentteri qoldaryn qoımaq bolyp otyrǵan strategııalyq shabýyldaýshy qarýlardy qysqartý týraly jańa shartqa qol qoıatyndaryn quptaımyz. Eki iri ıadrolyq memleket jeke arsenaldaryn qysqartý jáne jahandyq ıadrolyq qaýipsizdikke qol jetkzý úshin berik saıası erik-jigerin kórsetip otyr», dedi N. Nazarbaev. N. Nazarbaev Qazaqstan sondaı-aq Vashıngtonda ótetin ıadrolyq qaýipsizdik jónindegi sammıtke kóp úmit artatynyn atap kórsetti.
«Kelissózder kezinde biz Aral teńizi basseınindegi ekologııalyq jáne áleýmettik-ekonomıkalyq jaǵdaıǵa aıryqsha kóńil bóldik. Araldy qutqarý jónindegi halyqaralyq qordyń áleýetin keńinen paıdalanýǵa kelistik», dedi N. Nazarbaev.
Elbasynyń aıtýynsha, kelissózder kezinde Ortalyq Azııa óńirindegi ekonomıkalyq jáne sý-energetıkalyq problemalar da talqylanǵan.
