N. Nazarbaev paıdalanylmaǵan sýarmaly jerlerdi aınalymǵa engizý máselelerine nazar aýdarýdy tapsyrdy
ASTANA. QazAqparat - Memleket basshysy Nursultan Nazarbaev Aýyl sharýashylyǵy mınıstrliginiń Sý resýrstary jónindegi komıtetiniń tóraǵasy Islam Ábishevti qabyldady.
Bul týraly Aqordanyń baspasóz qyzmetinen habarlady.
I.Ábishev Memleket basshysyna sý sharýashylyǵyn damytýdyń negizgi máseleleri men respýblıkanyń sý qoryn tıimdi paıdalaný jáne qorǵaý jumystary jóninde baıandady.
Qazaqstan Prezıdenti elimizde sýmen qamtamasyz etý máselesi asa ózekti ekenin atap ótti.
- Elimizde jalpy sý tapshylyǵy máselesi bar. Jańa bógetter qurylysyn salý qajettiligin anyqtap, jerasty sýlaryn paıdalaný, jaıylymdardy sýlandyrý jóninde zertteýler júrgizý kerek, - dedi Memleket basshysy.
Nursultan Nazarbaev elimizde sý sharýashylyǵyn damytý úshin úlken jumystar atqarylyp jatqanyna toqtaldy.
- Aral teńiziniń soltústik bóligin saqtaý jóninde aýqymdy sharalar qabyldanýda. Memleketten bólingen qomaqty qarajattyń arqasynda Araldyń soltústik bóligi Aral qalasyna jaqyndady. Osynyń bári jergilikti halyqtyń turmysyn jaqsartýǵa oń yqpalyn tıgizdi, balyq aýlaýǵa, jumys oryndaryn qurýǵa múmkindik berdi. Qyzylorda oblysynyń sý resýrstaryna degen zárýligin óteý úshin Kóksaraı sý qoımasy salyndy. Ol óńirdi jyldaǵy sý basý qaýpinen qutqardy. Maqtaaral aýdanyndaǵy gıdromelıoratsııa jumystaryna da edáýir qarajat jumsaldy, - dedi Qazaqstan Prezıdenti.
Kezdesý barysynda Memleket basshysy paıdalanylmaǵan sýarmaly jerlerdi aınalymǵa engizý, kórshi eldermen transshekaralyq ózenderdi tıimdi paıdalaný boıynsha tıimdi is-qımyl jasaý máselelerine de aıryqsha nazar aýdardy.
I.Ábishev sýmen qamtamasyz etý máseleleriniń birtindep sheshilýin aýyl turǵyndary oń baǵalap otyrǵanyn aıtty. Ol sondaı-aq qazirgi kezde Sý resýrstaryn basqarý jónindegi memlekettik baǵdarlamaǵa sáıkes, eldiń barlyq sý kózderin túgendeý júrip jatqanyn atap ótti.
Kezdesýdiń qorytyndysy boıynsha Memleket basshysy birqatar naqty tapsyrmalar berdi.
