N.Nazarbaev: Óziniń súıikti jumysyn tapqan adam baqytty
ASTANA. QazAqparat - Qazaqstan telearnalaryna suhbat bergen Memleket basshysy Nursultan Nazarbaev qazir balany beıimine qaraı oqytý kerek deıdi.
"Oılap qarasaq, Keńes odaǵy kezinde qazaqtyń balalaryn óndiriske jibermedi. Men óndiriste júrdim, sonda oılanamyn, jalaqysy jaqsy jerde, mamandyq jaqsy jerde qazaqtyń balalary bolǵan joq. Jańa Óskemendegi, Pavlodardaǵy zaýyttarǵa barǵan kezde qazaqtyń balalary endi kelip jatqanyn baıqaımyn. Budan bólek, qazir soltústiktegi jumysker mamandardy oqytatyn oqý oryndarynda jumys taba almaı júrgen ońtústiktiń balalaryn shaqyryp, oqytyp jatyrmyz. Ótkende aıtqanymdaı, birinshi mamandyqty memleket tegin beredi. Eldiń barlyǵy ýnıversıtet bitire almaıdy, onyń ústine, dúnıeniń barlyǵy jumysshy adamnyń qolynda. Ol jumysshy adam óz salasynyń naǵyz sheberi bolsa, tabysy da joǵary bolady. Bir mamandyq al da sol jerde qal dep otyrǵan joqpyn. Er bala bolsyn, qyz bala bolsyn, birinshi mamandyǵy qolynda júredi. Nan taba alady. Odan keıin baryp ýnıversıtetke túsip, ary qaraı ósýine múmkindik bolady", - deıdi N.Nazarbaev
Elbasy atap ótkendeı, balany beıimine qaraı oqytsa, ol ómirdegi dara jolyn ózi-aq tabady.
"Balaǵa qazirgi zamanǵa saı bilim berýge talpyný kerek. Sonda joly ashylyp, óz jolyn ózi tabady. Ərıne, talanty bar bolsa, bala kezinen matematıkaǵa, bıologııaǵa beıimdelgen bolsa, qaı jerge deıin barady eken dep, sony demep jiberý kerek. Mysaly, sportta da balany sporttyń ər túrine berip kórý kerek, qaı túrge beıimi bar bolsa, sol jolmen júredi. Óziniń súıikti jumysyn tapqan adam baqytty. Jumysqa tańerteń oıanyp, qýana barasyń, jumystyń sońynda sharshap-shaldyqpaı, oralady", - degen Elbasy suhbat alyp otyrǵan jýrnalıst Erlan Igisinov pen Beısen Quranbekke jýrnalısterdiń de jumysy sondaı shyǵar degen oıyn qaljyńmen jetkizdi.
