N.Nazarbaev: Óskeleń urpaqtyń patrıottyq tárbıesine basa nazar aýdarylýy kerek

ASTANA. QazAqparat - Óskeleń urpaqtyń patrıottyq tárbıesine basa nazar aýdarylýy kerek. Búgin «Máńgilik El: bir el - bir taǵdyr» atty taqyryppen ótip jatqan Qazaqstan halqy Assambleıasynyń HHІІ sessııasy barysynda QR Prezıdenti, Assambleıa Tóraǵasy Nursultan Nazarbaev osylaı aıtty.

«Búgingi álemde qoǵamdaǵy barsha jurtshylyqqa birdeı qoldanýǵa bolatyn beıbitshilik pen kelisimniń naqty retsepti joq. Al biz álemde tuńǵysh bolyp jalpyqazaqstandyq ulttyq ıdeıany naqty qujat retinde bekitip otyrmyz. Bundaı tájirıbe esh jerde joq, biz bárinen alda kelemiz», - dedi N.Nazarbaev.

Sonymen qatar Elbasy jastardyń, óskeleń urpaqtyń patrıottyq tárbıesine basa nazar aýdarylýy kerektigin atap ótti. Buǵan bilim berý júıesiniń jalpylama kúshin, mádenı ortalyqtardyń, buqaralyq aqparat quraldarynyń kúshin jumyldyrý kerek.

«Bunda jalpyulttyq qundylyqtardy jumyldyratyn kúsh retinde bizdiń zııalylarymyzdyń róli de zor. Olar jańa Qazaqstan úshin jańa týyndylardy, jańa tulǵalardy týdyrýy kerek. Patrıottyq baǵytynda Mádenıet jáne sport mınıstrligi, Investıtsııalar jáne damý mınıstrligi Qazaqstan halqy Assambleıasymen birlese otyryp buqaralyq aqparat quraldary men Internette arnaıy jobalardy júzege asyrýlary kerek», - dedi N.Nazarbaev.