N.Nazarbaev ortalyǵynda «Ashyq aspan astynda» atty úshinshi halyqaralyq fotokórme ashyldy
NUR-SULTAN. QazAqparat - 3 qyrkúıekte Qazaqstan Respýblıkasy Táýelsizdiginiń 30 jyldyǵyna oraı, Konfessııaaralyq jáne órkenıetaralyq dıalogty damytý jónindegi N.Nazarbaev ortalyǵy alańynda ıýdaızmge arnalǵan «Ashyq aspan astynda» úshinshi halyqaralyq fotokórmeniń saltanatty ashylýy ótti, dep habarlaıdy QazAqparat.
Sharaǵa QR Aqparat jáne qoǵamdyq damý mınıstrligi Din isteri komıtetiniń tóraǵasy E.Núkejanov, Konfessııaaralyq jáne órkenıetaralyq dıalogty damytý jónindegi N.Nazarbaev ortalyǵy Basqarma tóraǵasy B. Sársenbaev, Qazaqstan Respýblıkasyndaǵy Izraıl Memleketiniń konsýly Galına Frenkel, Nur-Sultan qalasynyń bas ravvıni Shmýel Karnaýh, sondaı-aq basqa dinı birlestikterdiń jáne Qazaqstandaqy AQSh, Reseı, Japonııa, Vatıkan, Belgııa elderiniń dıplomatııalyq ókildikteriniń ókilderi qatysty.
Fotokórmeniń maqsaty – álemniń ár túrli halyqtarynyń dinderi men mádenıetterine tolerantty dúnıetanymdy jáne qurmetpen qaraýdy qalyptastyrý, qoǵamdy negizgi adamı jáne rýhanı qundylyqtardyń aınalasyna toptastyrý, konfessııaaralyq jáne órkenıetaralyq dıalogty, halyqaralyq beıbitshilik pen qaýipsizdikti saqtaýda birlesken jaýapkershilikti nyǵaıtýǵa járdemdesý.
Rásim sońynda sharaǵa qatysýshylar Qazaqstan Respýblıkasyndaǵy Izraıl Memleketiniń Elshiliginiń, Eýropa-Azııa evreıler kongresiniń Ortalyq Azııadaǵy ókildiginiń, «Habad Lıýbavıch» evreı ortalyǵy (Qaraǵandy q.), «Beıt Menahem» Habad úıi (Almaty q.) usynǵan fotosýrettermen tanys boldy.
Esterińizge sala keteıik, «Ashyq aspan astynda» fotokórmesi barlyq saqtyq sharalaryn saqtaı otyryp, barlyq adardar úshin Beıbitshilik jáne kelisim saraıynda 2021 jyldyń 13 qyrkúıegine deıin jalǵasatyn bolady.
