N. Nazarbaev lańkestikpen kúreste biryńǵaı halyqaralyq tártipti aıqyndaý kerek ekenin aıtty
«21 ǵasyrdyń basynda lańkestik shabýyldardan zardap shekkenderdiń sany 5 esege artyp, shamamen 150 myń adamdy qurady. Munyń 80 paıyzdan astamy Azııa, Taıaý Shyǵys jáne Afrıka elderinde bolyp jatyr. «DAISh», «BOKO HARAM», «Talıban», «Ál-Kaıda» dep atalatyn tórt uıym beıbit azamattarǵa qarsy qylmystyń shamamen 70 paıyzyn jasady»,- dedi N.Nazarbaev.
Bul derekter ShYU-ǵa múshe elderdiń qaýipsizdigine nuqsan keltirýi múmkin, dedi QR Prezıdenti. «Qazirgi qatygezdiktiń maqsatqa jetý jolyndaǵy ıdeologııasy men qımyldary barlyq dinniń negizi men fılosofııasyna qaıshy. Azamattarymyzdyń terrorıster jaǵynda kúresýi ózekti máselege aınaldy, sondyqtan bul qaýipke qarsy turýdyń biryńǵaı halyqaralyq tártibin anyqtaıtyn kez keldi», - dep atap ótti N. Nazarbaev. QR Prezıdenti ShYU ekstremızmmen kúresýge daıyn álemdik qaýymdastyq músheleri arasynda dıalog ornatýǵa óz úlesin qosýy tıis ekenin aıtty. «Sondyqtan terrorızmmen kúresý boıynsha álemdik biryńǵaı júıe qurý úshin aldaǵy BUU Assambleıasynyń kún tártibine osy máseleni engizgen durys. Lańkestik pen ekstremızm jáne separatızmmen kúres týraly ShYU baǵdarlamasyn qabyldaý, terrorızmmen kúrestegi ortaq konventsııaǵa aınalady dep úmittenemin», - dedi N. Nazarbaev.