N.Nazarbaev: Qysqy Ýnıversıada men Almaty metrosynyń 2-shi kezeńi qurylysyn qarjylandyrýdy qysqartý qajet
ASTANA. QazAqparat - Qysqy Ýnıversıada men Almaty metrosynyń 2-shi kezeńi qurylysyn qarjylandyrýdy qysqartý qajet. Búgin Aqordada ótken QR Úkimetiniń keńeıtilgen quramdaǵy otyrysynda Elbasy Nursultan Nazarbaev osylaı dedi.
«Men áleýmettik qajettilikke arnalǵan shyǵystardy qysqartý týraly usynys bar ekendigin bilemin. Bul jaqsy usynys, qarapaıym adamdarǵa qatysty bolmaǵanda ony qoldaýǵa da bolar edi. Máselen, ony qarapaıym adamǵa shyǵyn keltirmesten qaıdan izdeýge bolady? Máselen, bizdiń shyǵystar: bankterdi qoldaý úshin 500 mlrd., qysqy Ýnıversıadaǵa - 100 mlrd., metronyń ekinshi kezeńine - 227 mlrd. teńge. Qıyn kezeńde bizderge keıbirin kúte turý qajet. Odan keıin jalǵastyramyz», - dedi Elbasy.
Osy rette QR Prezıdenti qysqy Ýnıversıadanyń bir bóligin Astanada, ekinshisin Almatyda ótkizýge bolatynyn atap ótti. Buǵan qosa QR Prezıdenti atalǵan sharanyń ımıdjdik joba ekendigin ári sońyna deıin atqarý kerektigin basa aıtty.
«Biraq dál osy sharada shyǵys kóp, qarjyny bizderge sol jaqtan qarastyrý qajet. Bul ýaqytsha», - dedi N.Nazarbaev.
Sondaı-aq Elbasy Almaty metrosynyń 2-shi kezeńi qurylysyn toqtata turý qajettigin aıtty.
