N. Nazarbaev Qyrǵyzstandaǵy saıası kúshterdi eldegi jaǵdaıdy turaqtandyrýǵa shaqyrdy
ASTANA. Sáýirdiń 16-sy. QazAqparat /Ernur Aqanbaı/ - Qazaqstan Prezıdenti Nursultan Nazarbaev Qyrǵyzstandaǵy barlyq saıası kúshterdi ol eldegi jaǵdaıdy turaqtandyrýǵa bir kisideı atsalysýǵa shaqyrdy,
dep habarlaıdy QazAqparat.
«Biz Qyrǵyzstandaǵy barlyq saıası kúshterdi ózderiniń ambıtsııalaryn serpip tastap, bir kisideı jumylyp, jaǵdaıdy turaqtandyrý úshin jáne halyqtyń turmysyn jaqsartýdy bastaý úshin «bir jaǵadan bas, bir jeńnen qol» shyǵarýǵa shaqyramyz», dedi N. Nazarbaev búgin Aqordadaǵy brıfıngte.
Elbasynyń sózine qaraǵanda, Qyrǵyzstandaǵy bıliktiń vertıkalyn qalpyna keltirip, qarapaıym adamdardy zorlyq-zombylyqtan qorǵaý qazirgi tańdaǵy eń basty másele bolyp tabylady.
