N. Nazarbaev: Qurmanǵazy HІH ǵasyrdaǵy qazaq tarıhyn, mádenıetin jáne búkil halyqty kúıge qosyp jyrlaǵan erekshe tulǵa

Astanada dáýlesker kúıshi  Qurmanǵazy Saǵyrbaıulyna arnalǵan eskertkishtiń saltanatty ashylý rásimine qatysqan Memleket basshysy Nursultan Nazarbaev osylaı málimdedi.

«Biz búgingi kúni taǵy da bir mańyzdy oqıǵanyń kýágeri bolyp otyrmyz - uly halyq kompozıtory Qurmanǵazynyń eskertkishin ashýdamyz. Onyń «Saryarqa» kúıi biz búgin Astanany salǵan, sol arqyly búkil álemge tanylǵan dalaǵa arnalady.  Qurmanǵazy Saǵyrbaıuly HІH ǵasyrdaǵy qazaq tarıhyn, mádenıetin jáne búkil halyqty kúıge qosyp jyrlaǵan erekshe tulǵa. Sondyqtan da halqymyz Qurmanǵazynyń kúıin urpaqtan-urpaqqa jetkizip, jadynda máńgi saqtap keledi», - dep atap ótti Elbasy eskertkishtiń ashylý saltanatynda.

Sonymen qatar, Memleket basshysy Qurmanǵazy Saǵyrbaıulynyń eskertkishi ózi jerlengen Astrahan oblysynda (RF) ornatylǵanyn, sol eskertkish qaıta jańǵyrtylyp, onda arnaıy murajaı ashylǵanyn málim etti. Kúı atasy atanǵan Qurmanǵazynyń esimi  elimizdiń kóptegen kóshelerine, mádenı mekemelerine berilgen.

Eske sala keteıik, uly kompozıtor, dáýlesker kúıshi Qurmanǵazy Saǵyrbaıulynyń eskertkishi elordada Turan dańǵylynyń boıyndaǵy  «Dýman» konaqúı kesheniniń aýmaǵynda ornatyldy. Eskertkishtiń jalpy bıiktigi 10 metrdi quraıdy: 5,5 m - tuǵyry jáne 4,5 m - eskertkishtiń bıiktigi.