N.Nazarbaev: Qunsyzdaný is júzinde álemniń barlyq valıýtalaryn qamtydy
ASTANA. QazAqparat - Qunsyzdaný is júzinde álemniń barlyq valıýtalaryn qamtydy. Búgin otandyq telearnalar arqyly depýtattardyń Májilis pen máslıhat saılaýyn merziminen buryn ótkizý bastamasyna oraı Qazaqstan halqyna úndeý arnaǵan Elbasy Nursultan Nazarbaev osylaı dedi.
«Energııa tasymaldaýshylar baǵasynyń quldyraýy saldarynan kóptegen elderdi qamtyǵan ekonomıkalyq daǵdarys barsha álemdik ekonomıkaǵa jáne onyń ajyramas bólshegi retinde bizdiń elimizge de baıypty yqpal etedi. Osynaý qıyn-qystaý ýaqyt eldiń aldyna óte kúrdeli mindetter men syn-qaterlerdi júktep otyr», - dedi QR Prezıdenti.
Memleket basshysy óz sózinde halyqaralyq ahýaldyń kúrdelenip, jetekshi memleketter arasyndaǵy teke-tirestiń órshı túskendigin, sanktsııalyq sarsańnyń kúsheıgendigin basa aıtty.
«Sarapshylardyń basym bóligi «qyrǵı-qabaq soǵys» aıaqtalǵan sátten beri álemdik derjavalar arasyndaǵy kelispeýshilik qazirgideı jaǵdaıǵa jetken joq, degen ortaq pikirge kelip otyr. Mundaı jaǵdaıda óńirlik janjaldyń jańa oshaqtary paıda bolady. Muny biz kórip te otyrmyz. Lańkestik qater arta túsedi. Bosqyndardyń jahandyq tolqyny ǵalamshardyń jańa óńirlerine jaıyla túsýde. Álemdik saýda kólemi quldyraýda, qarjy naryqtarynyń qulaýy oryn alýda. Qunsyzdaný is júzinde álemniń barlyq valıýtalaryn qamtydy. Munyń barlyǵy da óńirlik jáne ulttyq ekonomıkaǵa teris yqpal etedi», - dedi N.Nazarbaev.
