N. Nazarbaev QR Joǵarǵy Sotyna negizsiz aqtaý úkimderi boıynsha tekserý júrgizýdi tapsyrdy
Mundaı tapsyrmany Memleket basshysy Aqordada QR-daǵy qylmys pen sybaılas jemqorlyqqa qarsy turý, esirtki zattarynyń zańsyz aınalymynyń jaǵdaıy, azamattardyń quqyqtary men bostandyqtary taqyrybyna qatysty quqyq qorǵaý organdary basshylarymen ótip jatqan keńeste júktedi.
«Sottar qylmyskerlerdi negizsiz aqtap otyr. Úsh jyldyń ishinde prokýrorlardyń narazylyǵy boıynsha 71 azamatqa qatysty zańsyz negizsiz aqtaý úkimderine tyıym salyndy»,-dedi QR Bas prokýrory Ashat Daýylbaev.
Onyń sózine qaraǵanda, 2011 jyly Astana qalasynyń soty kisi óltirý faktisi boıynsha aıyptalǵan Botabaevty aqtap shyǵardy. Prokýrorlardyń barlyq narazylyqtaryna qaramaı osy úkim kúshin saqtap qaldy. Araǵa 1 jyl salmaı Botabaev Іle Alataý ulttyq parkinde adamdardy jappaı óltirgen ekstremıstik turǵydaǵy toptyń quramynda tabyldy.
«Qazirgi kezde oǵan izdeý jarııalanǵan. Bul turǵyda sýdıalardyń eshqaısysy jaýapkershilikke tartylǵan joq»,-dedi Bas prokýror.
«Ony kisi óltirgeni dáleldense de sottalmaǵan ba?», - dep naqtylap suraǵan Elbasynyń saýalyna A. Daýylbaev: «Iıa, onyń qylmysy dálendense de, ol jazasyn tartqan joq»,-dep jaýap qaıtardy.
«Osyndaı jaǵdaılar boıynsha Bektas, sizder ózderińniń aralaryńda tıisti tekserý júrgizýleriń kerek. Soǵan barlyq qatysty adam, ıaǵnı kisi óltirgen adamdardy bekerge bosatqan joq qoı, aqshaǵa bosatty nemese basqa bir tanystary arqyly bosady. Basynnan-aıaǵyna deıin barlyǵyn jumystan nege qýyp shyqpadyńdar? Bul máseleni halyqqa nege aıtpadyńdar?»,-dedi N. Nazarbaev QR Joǵarǵy Sotynyń tóraǵasy Bektas Beknazarovqa qaratyp aıtqan sózinde.
