N.Nazarbaev QR Ulttyq mýzeıiniń qysh kitabyna estelik qoltańba qaldyrdy
ASTANA. QazAqparat - Elbasy Nursultan Nazarbaev Qazaqstan Respýblıkasynyń Ulttyq mýzeıin ashý rásimine qatysty.
Memleket basshysy jınalǵan qaýymdy kele jatqan Astana kúnimen quttyqtady jáne osy merekege oraı Astana men búkil Qazaqstan taǵy bir qundy syılyqqa - Ulttyq mýzeıge ıe bolǵanyn aıtty, dep habarlady Aqordanyń baspasóz qyzmeti.
- Mýzeıdiń ashylýy arqyly Qazaq eli sáýletti arhıtektýralyq keshenin qurý aıaqtalady. Táýelsizdik saraıy jáne kókke umsynǵan Stella, Beıbitshilik jáne kelisim saraıy, Áziret Sultan meshiti jáne Ulttyq óner ýnıversıteti, endi mine Ulttyq mýzeı - bular bizdiń halqymyzdyń máńgilik qundylyqtarynyń arhıtektýralyq kórinis tabýy, - dedi Nursultan Nazarbaev.
Qazaqstan Prezıdenti Ulttyq mýzeı ǵımaratynda halyqtyń ótkeni, qazirgisi jáne bolashaǵynyń tereń sımvolızmi beınelengenin atap ótti.
- Bul ashyqtyq, dástúrge adaldyq jáne ınnovatsııaǵa umtylys. Sáýletkerlik sheshimde máńgilik klassıka men kreatıvti modern sıntezi aıshyqtalǵan. Bul tarıhı dáýirlerdiń sabaqtastyǵyn aıryqsha tanyta túsedi, - dedi Memleket basshysy.
Nursultan Nazarbaev uly kóshpeliler órkenıetiniń laıyqty murageri bola otyryp, qazirgi Qazaqstan aldyna álemdegi eń damyǵan elderdiń otyzdyǵyna kirý syndy bıik maqsat qoıyp otyrǵanyn aıtty.
- Biz ekonomıka damýynyń joǵary qarqynyn kórsetip otyrmyz. Qazaqstandyqtardyń áleýmettik ál-aýqaty artyp keledi. Elimizdiń halyqaralyq bedeli nyǵaıa túsýde. Qazaqstandyqtardyń qazirgi býyny babalarymyzdyń birtutas, qýatty jáne álemde syıly memleket bolý týrasyndaǵy san ǵasyrlyq armanyn júzege asyrdy. Biz jańa Qazaqstandy nyǵaıta otyryp, ózimizdiń tarıhı mıssııamyzdy laıyqty atqaramyz, - dedi memleket basshysy.
Qazaqstan Prezıdenti jańa mýzeıdiń tarıhty tanytý jáne elimiz týraly tereń bilimdi sińirý ortalyǵyna ǵana emes, belgili mádenı jáne ǵylymı mekemege aınalatynyna senim bildirdi.
- Ulttyq mýzeı ǵylymı jáne rýhanı ortalyqqa aınalady, bizdiń Qazaqstan jolynyń barlyq ilgeri jetistikterin tanytady, arhıtektýralyq ólshemmen alǵanda, mýzeı ǵımaraty qazirdiń ózinde Reseıdiń Ermıtajymen, Frantsııanyń Lývrymen, Amerıkanyń Metropolıten mýzeıimen birge álemniń iri ekspozıtsııalary ondyǵynyń qatarynda tur, - dep atap ótti Nursultan Nazarbaev.
Memleket basshysy sońynda mýzeıdiń qysh kitabyna estelik qoltańba qaldyrdy, Astana zalyn, Táýelsiz Qazaqstan zalyn, sondaı-aq altyn, ejelgi jáne orta ǵasyrlar tarıhy, etnografııa jáne osy zamanǵy óner zaldaryn aralap kórdi.
Ulttyq mýzeıdiń kórme zaldary, qoımalar jáne jumys laboratorııalary 74 myń sharshy metrden astam kólemdi qamtıdy. Mýzeıdiń ekspozıtsııasyn jasaqtaý kezinde álemdik mýzeıtaný men jańa tehnologııanyń eń ozyq ádistemeleri qoldanyldy. Mýzeıde Qazaqstannyń ejelgi dáýirden qazirgi kúnge deıingi arheologııalyq, etnografııalyq, tarıhı-mádenı eskertkishteri jınaqtalǵan.
