N. Nazarbaev kınoındýstrııa qazaqstandyqtardyń mádenıetin damytýda mańyzdy ról atqaratynyn atap ótti
ASTANA. QazAqparat - Memleket basshsy Nursultan Nazarbaev Sháken Aımanov atyndaǵy «Qazaqfılm» AQ prezıdenti Ermek Amanshaevpen kezdesti, dep habarlaıdy Aqordanyń baspasóz qyzmeti.
Kezdesýde otandyq kınematografııanyń jaǵdaıy men damý perspektıvalary, kınostýdııanyń qazirgi jumysy, sondaı-aq aldaǵy kezeńge arnalǵan josparlary talqylandy.
Memleket basshysy búginde kınostýdııa qazaqstandyqtardyń mádenı damýynda aıryqsha ról atqaratynyna nazar aýdardy. Osy salanyń nyǵaıýy úshin memleket tarapynan barlyq qajetti jaǵdaılar jasalýda. Kınostýdııa joǵary dárejeli jabdyqtarmen jáne zamanaýı túsirý alańdarymen qamtamasyz etilgen.
Nursultan Nazarbaev óskeleń urpaqtyń tárbıesine oń yqpalyn tıgizýi tıis patrıottyq taqyryptaǵy fılmder óndirisi qajettigin atap ótti.
Qazaqstan Prezıdenti Qazaq handyǵynyń túrli tarıhı kezeńderine jáne sol zamannyń aıtýly tulǵalaryna arnalǵan kınolar túsirýdiń ózektiligine toqtaldy.
Nursultan Nazarbaev qazaqstandyqtardyń jas býynyn adamgershilik rýhta tárbıeleýge baǵyttalǵan anımatsııalyq fılmder jasaýdyń mańyzdylyǵyn da aıtty.
E.Amanshaev kınostýdııanyń jyl sońyna deıin prokatqa túrli taqyryptaǵy 8 fılm shyǵarýdy josparlap otyrǵanyn málimdedi. Sondaı-aq, qazaqstandyq kınofılmder byltyr 1 mıllıonnan astam kórermen jınaǵanyn atap ótti.
