N.Nazarbaev: Qazaqstannyń jahandyq damýǵa qosyp jatqan úlesin álem laıyqty baǵalaıdy dep senemin

ASTANA. QazAqparat - Qazaqstan ár ýaqytta da álemniń barlyq elimen dostyq qarym-qatynas ornatyp, aradaǵy senimdi saqtaýǵa talpynady. Búgin Qazaq handyǵynyń 550 jyldyǵyna arnalǵan saltanatty jıyn barysynda Memleket basshysy Nursultan Nazarbaev jahandyq damýǵa qosyp jatqan Qazaqstannyń osy talpynysyna álem laıyqty baǵasyn beredi degen senimin jetkizdi.

«Táýelsizdik jyldarynda Qazaqstan Eýroodaq, Amerıka jáne Islam elderimen tarıhtyń jańa paraqtaryn birge ashty. Qazaqstan kórshi eldermen dostyqty nyǵaıtyp, álemniń búkil elderimen aradaǵy senimdi saqtaýǵa talpynady. Qazaqstannyń 21 ǵasyrda jahandyq damýǵa qosyp jatqan osy úlesin álem laıyqty baǵalaıdy dep senemin»,-dep atap ótti Prezıdent.

«Qazaqtyń óz ishindegi bereke-birligi kúshti bolý kerek, danyshpan Abaı: «Birińdi qazaq, biriń dos, kórmeseń istiń bári bos» degen ósıetin aıtyp ketkeni de sol. Osyny esten shyǵarmaıyq. Alda qandaı syn-qaterler kútip tursa da, birligimizdiń arqasynda bizdiń bolashaǵymyz búgingiden de jarqyraıdy dep kámil senimmen aıta alamyn. Bárimizdiń kıeli atamekenimiz bar, ol - qazaqtyń Uly Dalasy. Sol Uly Dalada babalarymyzdyń izgi amanatyn oryndaý jolynda biz qurǵan qasıetti Otanymyz bar, ol - táýelsiz Qazaqstan. Táýelsizdik - bizdiń mańdaıǵa tıgen baǵymyz, máńgi saqtaýǵa tıis amanatymyz. Qasıetti Otanymyzda qandaı qıyndyqty da qaıyspaı qarsy alýǵa laıyq órshil rýhty, ozat oıly jasampaz halqymyz bar, ol - erjúrek qazaq halqy. Sol qaharman halyqtyń alǵa qoıǵan izgi muraty bar, ol - Uly Dala tósinde ózi qurǵan memleketti Máńgilik elge aınaldyrý», - dedi halyqty Qazaq handyǵynyń 550 jyldyǵymen quttyqtaǵan N.Nazarbaev.