N. Nazarbaev Qazaqstandy birinshi álemnen ekinshi álemge alyp shyqty - K. Saǵadıev
ASTANA. 28 qarasha. QazAqparat - N. Nazarbaev Qazaqstandy birinshi álemnen ekinshi álemge alyp shyqty. Búgin Astanada ótken «Qazaqstan Respýblıkasynyń Tuńǵysh Prezıdenti - Elbasy N. Nazarbaevtyń Qazaqstanda parlamentarızmniń qalyptasýyndaǵy róli» atty konferentsııa barysynda sóz sóılegen akademık Kenjeǵalı Saǵadıev osylaı málim etti.
«Qazaqstannyń tarıhy neni alǵa tartady? Oǵan úńilsek, Altyn orda men Deshti Qypshaqtan keıingi kóptegen ǵasyrlar boıy qazaqtar da, Qazaqstan da óz ómirinde osynshalyqty tereń ári túbegeıli ómir ózgeristerin, memlekettiginiń ózgeristerin, halyqaralyq qaýymdastyq tarapynan osynshama joǵary moıyndaýshylyqty bastan keshken emes. Bul N. Nazarbaevtyń basshylyǵy kezeńinde ǵana qurylǵan jańa memlekettiń arqasynda oryn aldy. Memlekettik qurylym tolyǵymen ózgerdi, ekonomıkalyq model aýysty, áleýmettik saıasat jańǵyrdy. Sońǵy 9-10 ǵasyrda qazaqtyń eshbir bıleýshisi de, hany da halyqaralyq qaýymdastyqtyń syrtynda qalǵan Qazaqstandy álemnen alastatylǵan kúıden alyp shyǵa almaǵan edi. Tuńǵysh Prezıdent N. Nazarbaev Qazaqstandy birinshi álemnen ekinshi álemge, joǵary - ortasha damý deńgeıindegi elder qataryna alyp shyqty», - dedi K. Saǵadıev.
Onyń aıtýynsha, búgingi kúni álemniń básekege qabiletti elý eliniń qataryna ený úshin elimizdiń bir nemese birneshe qadam jasaýy ǵana qalyp otyr. «Jańa Qazaqstan memleketiniń negizin qalaýshy N. Nazarbaev bizdiń tarıhymyzdaǵy qazirgi zamanda Qazaqstandy alǵash ret álemdik aldyńǵy qatarly pozıtsııaǵa alyp shyqqan lıder bolyp tabylady. Endeshe Elbasy bizdiń tarıhymyzda da osyndaı tarıhı eren erligimen, qaıta órleý dáýiriniń tulǵasy retinde qalýy kerek», - dedi K. Saǵadıev.
