N.Nazarbaev Qazaqstandy áıel adam basqarýy múmkin ekenin aıtty
ASTANA. QazAqparat - Sankt-Peterbýrg halyqaralyq ekonomıkalyq forýmynda sóılegen sózinde Qazaqstan Prezıdenti Nursultan Nazarbaev «laıyqty áıelder bar» ekenin eskere otyryp, el prezıdenttigine áıel adamdy saılaýǵa bolatynyn aıtty, dep habarlady RIA Novostı.
«Qazaqstanda nege áıel adam prezıdent bola almaıdy dep oılaısyzdar. Ábden bolýy múmkin. Qazaqstannyń 51 paıyzy áıelder, genderlik saıasat qalypty damý ústinde, parlament depýtattarynyń 30 paıyzy áıelder. Úkimet quramynda birneshe mınıstr áıel jumys jasap jatyr. Sondyqtan bul múmkin nárse, ári prezıdent bolýǵa daıyn áıelder bar», - dedi ol «Qazaqstandy bir kúnderi áıel prezıdent basqarýy múmkin be?» degen suraqqa jaýap bere otyryp.
RF Prezıdenti Vladımır Pýtın «keıbirimen tanys» ekenin aıtty. Oǵan jaýap retinde N. Nazarbaev úsh qyzy bolǵandyqtan, áıelderge erekshe qurmetpen qaraıtynyn ázilmen jetkizdi.
