N. Nazarbaev: Qazaqstan memlekettiń kúsh-qýaty men halyqtyń danalyǵyna súıene otyryp, barlyq mindetterdi júzege asyra alady
Іs-shara Memlekettik Tý men Prezıdent Baıraǵynyń, sondaı-aq Qazaqstan Respýblıkasy Konstıtýtsııasynyń Táýelsizdik saraıynyń Úlken zalyna saltanatty jaǵdaıda ákelinýinen bastaldy.
Memleket basshysynyń korteji «Aqorda» rezıdentsııasynan Táýelsizdik saraıynyń basqy esiginiń aldyna keldi. Osy jerde jańadan saılanǵan Qazaqstan Respýblıkasy Prezıdentine Memlekettik kúzet qyzmetiniń bastyǵy A.Kúreńbekov raport berdi.
Nursultan Nazarbaev artıllerııalyq ot-shashý bolyp jatqan kezde Táýelsizdik saraıyna kirdi.
Táýelsizdik saraıynyń Úlken zalynda Konstıtýtsııalyq Keńes tóraǵasy I.Rogov Konstıtýtsııanyń 42-babyna sáıkes, Qazaqstan Respýblıkasynyń Prezıdenti halyqqa ant bergen sátten bastap laýazymyna kirisetinin málimdedi.
Nursultan Nazarbaev oń qolyn Konstıtýtsııaǵa qoıyp:
«Qazaqstan halqyna adal qyzmet etýge, Qazaqstan Respýblıkasynyń Konstıtýtsııasy men zańdaryn qatań saqtaýǵa, azamattardyń quqyqtary men bostandyqtaryna kepildik berýge, Qazaqstan Respýblıkasy Prezıdentiniń ózime júktelgen mártebeli mindetin adal atqarýǵa saltanatty túrde ant etemin!» - dep, memlekettik tilde ant qabyldady.
Sodan keıin Elbasy Memlekettik týdy súıdi. Memlekettik ánurandy oryndaý barysynda 21 ret zeńbirekterden oq atyldy.
Ortalyq saılaý komıssııasynyń tóraǵasy Q.Turǵanqulov Nursultan Nazarbaevqa Qazaqstan Respýblıkasy Prezıdentiniń kýáligin tapsyrdy.
Memleket basshysy ulyqtaý rásiminde sóılegen sózinde Prezıdent saılaýy qoǵam birliginiń qýatyn pash etkenine toqtaldy.
«Qazaqstandyqtar maǵan uly senim kórsetip, Otanǵa taǵy qyzmet etýge shaqyrdy. Biz kúrdeli joldy birge júrip óttik: ózimizge senip, Táýelsizdigimizdi aldyq, memleket quryp, álemge jańa Qazaqstannyń esigin ashtyq, ózimizdi birtutas uly ult retinde tanyttyq. Sizderdiń senimderińiz meni árdaıym shabyttandyrdy, senimdilik pen kúsh-qýat berdi. Qazir barlyq jaýapkershilikpen aıtqym keledi: buǵan deıingi jyldardaǵy sııaqty halyqqa adal qyzmet etip, eldiń jáne barlyq azamattarymyzdyń amandyǵyn saqtap, jalpyulttyq bıik múddelerimizdi qorǵaıtyn bolamyn», - dedi Qazaqstan Prezıdenti.
Nursultan Nazarbaev eldiń ári qaraı damýyna qater tóndiretin birqatar syrtqy yqpaldarǵa nazar aýdardy.
«Bul - álem qalpynyń daǵdarysy men jalpy belgisizdiktiń órshýi. Álemdik ekonomıkanyń týrbýlenttiligi jalǵasýda. Sanktsııalyq, «valıýtalyq» jáne saýda soǵystary barlyq elderde jaǵdaıdy ýshyqtyrýda. Klımattyń ózgerý úderisi búginde boljap bolmaıtyn saldarlarǵa, túrli apattarǵa bastaýda. Ortalyq Azııaǵa álemdik bólinistiń jańa ózgeristeri áserin tıgizýi múmkin, bul da - búkil óńir úshin qater. Jahandyq qalyptyń daǵdarysy men álemdik ekonomıkadaǵy turaqsyzdyq osy syn-qaterlermen kúrestegi halyqaralyq úılestirý máselesin dármensiz ete túsedi», - dedi Memleket basshysy.
Qaaqstan Prezıdenti reformalardy oryndaý úshin kúsh-jiger jumyldyrý qajettigin aıtty.
«Taıaý arada el Prezıdentiniń janynan Jańǵyrtý jónindegi ulttyq komıssııa qurylatyn bolady. Onyń maqsaty - bes reformanyń kezeń-kezeńimen júzege asyrylýyn basqarý jáne memlekettik organdardyń, bıznes sektory men azamattyq qoǵamnyń is-qımylyn úılestirý. Ulttyq komıssııa janynda quramyna bedeldi sheteldik jáne qazaqstandyq sarapshylar kirgen Halyqaralyq konsýltatıvtik keńes áreket etetin bolady. Bul eń ozyq halyqaralyq tájirıbeni paıdalanýǵa septigin tıgizedi», - dedi Nursultan Nazarbaev.
Budan bólek, Memleket basshysy komıssııanyń birinshi otyrysynda «memleket qurý isindegi endigi 100 naqty qadam» Ult jospary tanystyrylatynyn aıtty.
«100 qadam» - bizdiń jahandyq jáne ishki syn-qaterlerge qarsy jaýabymyz, sonymen birge damyǵan otyz memlekettiń qataryna jańa tarıhı jaǵdaılarda qosylý jónindegi jospar», - dedi Qazaqstan Prezıdenti.
Sońynda Nursultan Nazarbaev Qazaqstan memlekettiń kúsh-qýaty men halyqtyń danalyǵyna súıene otyryp, barlyq mindetterdi júzege asyra alatynyn aıtty.
«Men ultqa ózim jarııalaǵan reformalarǵa keńinen atsalysý jóninde sóz arnaımyn. «Respýblıka» sózi latyn tilinen tikeleı «ortaq is» dep aýdarylady. Qazaqstannyń jańǵyrtylýy - bizdiń ortaq isimiz», - dedi Memleket basshysy.
Sózin aıaqtaǵannan keıin el Prezıdenti - Qazaqstan Respýblıkasynyń Joǵarǵy Bas qolbasshysy Táýelsizdik saraıy aldyndaǵy alańda Qorǵanys mınıstri I.Tasmaǵambetovtiń raportyn qabyldady. Memleket basshysynyń aldynan Qazaqstan Respýblıkasy Qarýly kúshteriniń ókilderi saltanatty sherýmen júrip ótti.
Ulyqtaý rásimine Joǵarǵy sot sýdıalary, Qazaqstan Respýblıkasy Parlamentiniń depýtattary, Prezıdent Ákimshiligi men Premer-Mınıstr Keńsesiniń ókilderi, Qazaqstanda tirkelgen dıplomatııalyq ókildikter men halyqaralyq uıymdardyń basshylary, memlekettik basqarýdyń ortalyq organdary basshylary, Úkimet músheleri, jaýapty hatshylar, oblystardyń, Astana men Almaty qalalarynyń ákimderi, Qazaqstan halqy assambleıasynyń músheleri, dinı konfessııalar ókilderi, Respýblıkalyq bıýdjettiń oryndalýyn baqylaý jónindegi esep komıtetiniń músheleri, Ortalyq Saılaý komıssııasynyń músheleri, Konstıtýtsııalyq Keńes músheleri, prezıdenttikke kandıdattar, respýblıkalyq jáne óńirlik qoǵamdyq shtab, saılaýdy baqylaý jónindegi respýblıkalyq qoǵamdyq komıssııa músheleri, «Nur Otan» partııasynyń basshylyǵy, Tuńǵysh Prezıdent mekemeleri men uıymdarynyń jetekshileri, demokratııalyq kúshterdiń «Qazaqstan-2050» jalpyultyq koalıtsııasy músheleri, «Halyq qaharmany» jáne «Eńbek eri» ataǵy ıegerleri, el generalıteti, senimdi ókilder, qoǵamdyq-saıası birlestikter men úkimettik emes uıymdar jetekshileri, respýblıkalyq buqaralyq aqparat quraldarynyń basshylary, kórnekti ǵylym, mádenıet jáne óner qaıratkerleri, respýblıkanyń isker toptar ókilderi, jastar uıymdarynyń kóshbasshylary qatysty. Іs-sharaǵa barlyǵy 3 000-ǵa jýyq adam shaqyryldy.
Qazaqstan Respýblıkasy Prezıdentiniń saılaýy 2015 jylǵy 26 sáýirde ótti. Qazaqstan Respýblıkasy Ortalyq Saılaý komıssııasynyń málimeti boıynsha, daýys berýge 9 090 920 adam nemese saılaýshylardyń 95,21 paıyzy qatysqan. Nursultan Nazarbaev saılaýshylardyń 8 833 250 daýsyna ıe boldy, bul - daýys berý rásimine qatysqan saılaýshylar daýsynyń 97,75 paıyzy.