N. Nazarbaev energııa únemdeýdi Ońtústik Koreıadan úırenýge shaqyrady
ASTANA. QazAqparat - Energııany únemdeýdi úırenbesek, aldyńǵy qatarly 30 eldiń quramyna kirýdi oılaýdyń ózi artyq. Bul týraly búgin ÚIID MB 2014 jyldyń І jartyjyldyǵy nátıjelerimen tanysý barysynda Qazaqstan Prezıdenti Nursultan Nazarbaev aıtty.
«Energııany tıimdi paıdalaný, energııany únemdeı bilý Qazaqstan úshin búgingi kúni aýadaı qajet. Energııa men gazdyń quny budan bylaı óspese, tómendemeıdi, biz qalaıyq, qalamaıyq, olardyń baǵasy álemdik baǵaǵa jaqyndaýy zańdylyq. ıAǵnı, bizdiń bolashaǵymyz tek energııany únemdeýde, energııany az paıdalanatyn qurylǵylardy paıdalanýda jatyr. «Jasyl ekonomıka» degenimiz de osydan shyǵady. Energııany únemdeýdi úırenbesek, aldyńǵy qatarly 30 eldiń quramyna kirýdi oılaýdyń ózi artyq», - dedi Elbasy.
Nursultan Ábishuly energııany únemdeýdi úırený úshin Ońtústik Koreıanyń tájirıbesin alǵa tartty.
«Men burynyraqta tapsyrma bergen edim. Tasymaldaý kezinde energııany joǵaltý deńgeıin tómendetý kerek dedim. Al onymen eshkim aınalysyp jatqan joq. Biz ózimiz shyǵarǵan energııany tasymaldaý kezinde 20 paıyzyn joǵaltamyz. Al Ońtústik Koreıa 7-8 paıyzyn ǵana shyǵyndaıdy. Óıtkeni olar energııa joǵaltýdy dereý tómendetetin tehnologııany paıdalanady. Bizge de elektr stansalaryn salýdy emes, sol energııany únemdeýge kómektesetin jańashyldyqtardy engizip, zaýyttar men kásiporyndardy jańa qurylǵylarmen jabdyqtaý qajet», - dedi Prezıdent.
