N.Nazarbaev: Eń qıyny - óńdeýshi ónerkásipti ındýstrııalandyrý edi

ASTANA. QazAqparat - Indýstrııalandyrý baǵdarlamasynda eń qıynǵa soqqany óńdeýshi ónerkásip salasyn ındýstrııalandyryp, jańa óndirister ashý boldy. Bul týraly búgin 2016 jylǵy birinshi jartyjyldyqtaǵy ındýstrııalandyrý qorytyndysy jónindegi keńes barysynda Memleket basshysy Nursultan Nazarbaev málim etti.

Degenmen, Prezıdent atap ótkendeı, ındýstrııalandyrý baǵdarlamasy bastalǵannan beri, óńdeýshi ónerkásip salasynda myńnan asa kásiporyn ashylǵan eken.

«Búgin iske qosylǵan kásiporyndardyń barlyǵy ońaılyqpen iske qosylǵan joq, sondyqtan da, qazirgi qıyn jaǵdaıda olar el damýyna úles qosýy kerek», - dedi Prezıdent telekópir arqyly óńir-óńirdegi jańa kásiporyndardy iske qosqan soń.

«Osydan alty jyl buryn ındýstrııalandyrý baǵdarlamasyn bastaǵan edik, bul jyldary óńdeýshi ónerkásip salasynda myńnan asa kásiporyn iske qosylyp, qazaqstandyqtar úshin múlde jańa 500 óndiris iske qosyldy. Qazaqstan boıynsha eki júz myńnan asa jumys orny ashyldy. Taǵy bir basty jetistik  óńdeýshi ónerkásiptiń oza damýy. Keńes odaǵy kezinde Qazaqstan shıkizat jetkizýshiniń rólin ǵana atqaryp, óziniń mashına qurylys salasyn, óńdeýshi salasyn  damytpaǵan eskersek, bul kádimgideı úlken tóńkeris. Mine, ındýstrııalandyrý osydan bastalady. Óńdeýshi ónerkásiptik ındýstrııalanýy nege sonsha qıyn bolady? Sebebi, onyń negizi joq edi»,-dedi Prezıdent.

N.Nazarbaev atap ótkendeı, ósý qarqyny boıynsha óńdeýshi ónerkásip taý-ken ónerkásibi salasyn basyp ozyp otyr.