N. Nazarbaev elordada qyzmetterdi ǵalamtor arqyly usynýdy batyl engizýdi tapsyrdy
ASTANA. QazAqparat - Búgin «Astana Opera» teatrynda elordany odan ári damytý jónindegi keńeste Elbasy Nursultan Nazarbaev bıletterdi ǵalamtormen satý jelisin damytýdy tapsyrdy.
«Birqatar jobalar júzege asyrylýda, alaıda qalalyqtar burynǵysynsha qyzmetterdi eski tártippen alyp jatyr. Máselen, ákimdik byltyr úsh mıllıon qyzmettiń tek 0,6 paıyzyn elektrondy formatta usyndy. Barlyq kıno teatrlardyń ishinde tek «Han Shatyr», «Astana Opera» bıletterdi ǵalamtormen saýdalaıdy. Osyndaı qyzmetterdi barlyq jerde engizýge bolady. Men osy eki mysaldy ǵana keltirdim. Qyzmet kórsetýdiń osy júıesine aýysý kerek», - dep tapsyrdy Memleket basshysy.
Osy oraıda Prezıdent qalada kommýnaldyq qyzmetterge tólem jasaý úshin adamdar birneshe uıymdardy aralaýǵa májbúr ekenin atap ótti.
«Barlyq jerde adamdar kezekte turady. Men osyny tekserý úshin adamdardy arnaıy jiberdim. Sondyqtan osy máseleni sheshińizder»,- dep tapsyrma júktedi Elbasy.
Óz kezeginde ákimdik ókilderi elordada Biryńǵaı tólem qujaty 2008 jyldan beri jumys istep kele jatqanyn, birtindep barlyq kásiporyndar osy júıege aýystyrylyp jatqanyn jetkizdi. Bıyl PIK- terdi osy júıege aýystyrý boıynsha jumystar belsendi atqarylyp jatyr. Aǵymdaǵy jyldyń sońyna deıin jylý men elektr energııasy qyzmetteri Biryńǵaı tólem qujatyna enetin bolady.
