N. Nazarbaev eline meılinshe paıdasyn tıgizgen álemdik lıderlerdiń bestigine kiredi
Bilim jáne ǵylym mınıstrligine qarasty Memleket tarıhy ınstıtýty men «QR Tuńǵysh Prezıdenti - Ult Kóshbasshysy kitaphanasy» memlekettik mekemesiniń qoldaýymen jaryqqa shyqqan kitap avtorlary professor Búrkitbaı Aıaǵan men Álıma Aýanasova. Kitapta jańa ádistemelik ustanymdar negizinde basty nazar ǵasyrlar toǵysyndaǵy Elbasynyń progressıvti róline, KSRO daǵdarysynyń Memleket basshysynyń saıası sanasyna áser etý máselelerine aýdarylady. Sonymen qatar, N. Nazarbaevtyń tarıhı damý barysynda paıda bolǵan saıası kózqarastary men qabyldaǵan sheshimderiniń sebepteri baıandalady. Budan bólek, avtorlar táýelsiz Qazaqstannyń negizin qalaýshy Ult Kóshbasshysynyń reformatorlyq baǵytyn is júzinde júzege asyrýmen baılanysty aýqymdy máselelerdi qarastyrady.
«Tarıhı-ómirbaıandyq janrda jazylǵan kitapta kóptegen faktologııalyq materıaldar jınaqtalyp, Elbasynyń álemdik aýqymdaǵy saıasatker retinde qalyptasý jaıy baıandalady. Máselen, kitapta mynadaı bir mysal keltiriledi, oqyp bereıin: «2013 jyldyń shildesinde Postdaǵdarystyq álem ınstıtýty qory álemniń 68 elinen 300-den astam sarapshylarǵa saýalnama júrgizip sonyń nátıjesinde: «Nursultan Nazarbaev - óz eline meılinshe paıdasyn tıgizgen álemdik lıderlerdiń bestigine kiretin búgingi zamannyń eń tanymal saıasatkerleriniń biri» degen qorytyndyǵa keledi. Bul óte joǵary baǵa», - dedi jıyn barysynda sóz sóılegen «Egemen Qazaqstan» respýblıkalyq gazeti» AQ prezıdenti Saýytbek Abdrahmanov.
Sonymen qatar, kitapta Elbasy Nursultan Nazarbaevtyń KSRO daǵdarysyn eńserýdegi róline de úlken mán berilip, sol kezdegi saıası ustanymdar men sheshimderge taldaýlar, joǵary baǵalaýlar jasalǵan. Sonymen qatar, kitapta qazaq, orys jáne aǵylshyn tilderindegi muraǵat materıaldary men derekter paıdalanylyp otyr.
