N. Nazarbaev - eldegi uzaqmerzimdi josparlardyń, tereń saıası hám ekonomıkalyq reformalardyń kepili - R. Muqashev
ASTANA. 14 qańtar. QazAqparat /Qanat Mámetqazyuly/ - N. Nazarbaev eldegi uzaqmerzimdi josparlardyń, tereń saıası hám ekonomıkalyq reformalardyń kepili.
Búgin QR Parlamenti palatalarynyń birlesken otyrysynda «QR Konstıtýtsııasyna ózgerister men tolyqtyrýlar engizý týraly» zań jobasy boıynsha baıandaǵan Májilistiń Zańnama jáne sot-quqyqtyq reforma komıtetiniń tóraǵasy Rahmet Muqashev osylaı málim etti.
«Memlekettigimizdi qurýshy ári egemen Qazaqstannyń demokratııalyq, zaıyrly, quqyqtyq damýyna ólsheýsiz úles qosqan QR Tuńǵysh Prezıdenti-Elbasy N. Nazarbaevtyń róli erekshe. Qazaqstan halqynyń ǵana emes, álemdik qaýymdastyqtyń aldynda Elbasynyń bedeli bıik ári baıandy. Prezıdent N. Nazarbaevtyń dana saıasatynyń arqasynda elimizde ultaralyq kelisim men halyqtar dostyǵy myzǵymas kúıde tur, ekonomıkalyq ósim de qamtamasyz etilýde. Jalpy qazaqstandyqtar óz lıderine tolyq senimmen qaraıdy. Ol uzaqmerzimdi josparlardyń túbegeıli atqarylýynyń, memlekettik progrestiń turaqtylyǵynyń, tereń saıası ám ekonomıkalyq reformalardyń kepili», - dedi zań jobasy boıynsha baıandaǵan Májilistiń Zańnama jáne sot-quqyqtyq reforma komıtetiniń tóraǵasy Rahmet Muqashev.
Sonymen qatar konstıtýtsııalyq ózgeristerge toqtalǵan depýtat, táýelsiz memleketti qalyptastyrýshy ári qurýshy retinde N. Nazarbaevtyń tarıhı róli men mıssııasyn sezine otyryp, respýblıkalyq referendýmda QR Tuńǵysh Prezıdenti-Elbasynyń prezıdenttik ókilettikterin uzartýdy qarastyratyn QR Konstıtýtsııasynyń 5 baby 42- tarmaǵyna ózgerister engizýdi qabyldaýdyń usynylǵanyn jetkizdi. «Konstıtýtsııanyń 3-babyna sáıkes, memlekettik bıliktiń jalǵyz kózi - halyq. Halyq óziniń bıligin respýblıkalyq referendým arqyly júzege asyra alady», - dedi komıtet tóraǵasy R. Muqashev.
