N. Nazarbaev: Dúnıe daǵdarysynan tek qýatty ındýstrııaǵa ıe el ǵana qulpyryp shyǵa alady
ASTANA. 28 qarasha. QazAqparat - Álemniń ozyq otyzynyń qataryna ený úshin jan basyna shaqqandaǵy ónimniń eń kemi 60 myń dollardy quraýy kerek. Búgin Astanada «Bolashaq» halyqaralyq stıpendııasynyń 20 jyldyq mereıtoıyna arnalǵan forým barysynda QR Prezıdenti Nursultan Nazarbaev osylaı aıtty.
«Úshinshi ındýstrııalyq revolıýtsııa - bul bizdiń bolashaq. Ol jurtshylyqqa jańa múmkindik ashady. Sizder de menen jaqsy bilesizder, jańa bilim, jańa tehnologııa - osylardyń bári bizdiń búgingi kózqarasymyzdy túbegeıli tóńkerip tastaı alady. Endigi 30-40 jyldan soń damyǵan elderdiń klýbyna múldem basqa elder múshe bolýy da ábden múmkin. Sondyqtan da, biz búgingi kúni ǵasyrdyń orta tusynda eń basty perspektıvaly elder kim bolýy kerektigin naqty kóz aldymyzǵa elestetýimiz kerek», - dedi Nursultan Ábishuly. Bul rette Elbasy damyǵan otyz eldiń qatarynda bolý jalpy ishki ónimniń joǵary deńgeıimen ǵana ólshenbeıtinin de jetkizdi. Prezıdenttiń aıtýynsha, sarapshylar baǵalaýyna sáıkes, ozyq otyzdyń arasynda bolý úshin Qazaqstanǵa eń kem degende jan basyna shaqqandaǵy 60 myń dollar bolýy shart. «Al osy deńgeıdi saqtap turý úshin ekonomıkanyń ornyqty ósimin qamtamasyz etýge tıispiz. Bizge Qudaı bergen jer qoınaýynyń baılyǵy bar. Munaıymyz, gazymyz, altyn men kómirimiz de barshylyq. Bul bizdiń kemshiligimiz emes, ony ekonomıkanyń basqa qyrlaryn serpiltetin múmkindigimiz dep qaraǵan lázim. Soǵan biz kirisip te jatyrmyz», - dedi N. Nazarbaev. Budan bólek, Elbasy jahandyq daǵdarys máselesine toqtala kele buǵan qatysty da óz paıymyn pash etti. «Dúnıe daǵdarysynan tek qýatty ındýstrııaǵa ıe el ǵana qulpyryp shyǵa alady. Sondyqtan da biz ındýstrııalandyrý saıasatyna kiristik. Álbette, bul - asa kúrdeli mindet. Másele Qazaqstannyń ár túkpirine kásiporyndardy qaptata berý emes, bizdiń buǵan múmkindikterimiz de barshylyq. Másele salynatyn kásiporyndardyń qandaı baǵytta ekendiginde bolyp otyr. Bizge álemdik deńgeıdegi básekege tótep beretin kásiporyndar qajet. Óıtkeni, biz - Kedendik odaq aıasynda shynyǵyp alyp, DSU-ny betke ustaǵan elmiz», - dedi N. Nazarbaev.
