N. Nazarbaev: Dinge sene otyryp, óz saltymyz ben ǵurpymyzdy saqtaýymyz kerek
ASTANA. 16 jeltoqsan. QazAqparat /Qanat Mámetqazyuly/ - Dinge sene otyryp, ony bile otyryp, óz saltymyzdy, ǵurpymyzdy saqtaýymyz kerek. Búgin Astanada «Nur Otan» HDP respýblıkalyq saılaýaldy shtabynda bolyp, onda selektorlyq keńes ótkizgennen soń partııa Tóraǵasy, QR Prezıdenti Nursultan Nazarbaev osylaı málimdedi.
«Barshamyz úshin Qudaı jalǵyz, biraq oǵan barar jol ártúrli. Menińshe, osy tujyrym durys sekildi. Eger ıslamdy alatyn bolsaq, biz dinge jan-jaqty jaǵdaı jasaýdamyz. 3 myńnan astam meshit salyndy. Jastarymyz meshitke baryp ta jatyr. Alaıda, solardyń nıeti shyn bolsa eken. Áıtpese jumada namaz oqyp, ertesinde araq iship, urlyqqa baratyn bolsa, bul ekijúzdilik emes pe?!», - dedi N. Nazarbaev óz pikirin bildire otyryp.
Budan bólek, Prezıdent ár eldiń yqylymnan qalyptasqan óz ádet-ǵuryptary bar ekendigin, din máselesinde olardyń da saqtalýy kerektigin eske saldy. «Men basyna oramal salyp júrgenderge esh qarsy emespin. Bizdiń analarymyz da aqjaýlyq salyp júretin. Alaıda, arabtardyń betperdesin jamylyp júrý, bul bizdiń saltymyz emes. Basynda Qurannyń ózi arab tilinde túsken soń, barsha musylman sol tilde sóılesin degen de qaǵıda bolǵan bolýy kerek. Biz ondaı el emespiz. Ózimizdiń salt-ǵurpymyz bar. Bala týǵannan bastap, onyń úılegenine, janazasyna deıin de óz saltymyz bar. Sol sekildi kıimimiz de basqa. Dinge sene otyryp, ony bile otyryp, óz saltymyzdy, ǵurpymyzdy saqtaýymyz kerek. Buny da saılaýdyń úgit naýqany barysynda jurtshylyqqa túsindirgen lázim. Árıne, bul óte názik másele», - dedi N. Nazarbaev.
