N. Nazarbaev damýshy elderge úlgi bolarlyq qazaqstandyq damý jolynyń modelin qalyptastyrdy - Memlekettik hatshy
ASTANA. 29 qarasha. QazAqparat - Nursultan Nazarbaev damýshy elderge úlgi bolarlyq qazaqstandyq damý jolynyń modelin qalyptastyrdy.
Búgin Astanada «Jańa álemdegi jańa Qazaqstan» atty «Birinshi Nazarbaev oqýlary» halyqaralyq forýmy barysynda sóz sóılegen QR Memlekettik hatshysy Muhtar Qul-Muhammed osylaı málim etti.
«Amerıkalyqtarda ejelden qalyptasyp, frazeologııalyq aınalymda júrgen «negizin qalaýshy-ákeler» atty túsinik bar. Mundaı keremet ataýǵa AQSh memlekettik qaıratkerleri Djordj Vashınton, Tomas Djefferson, Djeıms Medıson, Aleksandr Gamıltondar jatqyzylatynyn bárińiz bilesizder. Bálkim bul minberden men neni meńzegim kelip otyrǵanymdy kópshilik túsingen bolary. Iá, shynymen de Nursultan Nazarbaev barlyq qazaqstandyqtar úshin táýelsiz Qazaqstannyń «negizin qalaýshy-ákesi» bolyp tabylady. Bul esh artyq aıtqandyq emes», - dedi Memlekettik hatshy.
Sonymen qatar, M.Qul-Muhammed Elbasynyń Táýelsizdik týraly deklaratsııa men zańnyń negizin qalaǵanyn, Ata zańdy jańǵyrtýdy júzege asyrǵanyn, osynyń nátıjesinde elimizde túrli baǵytta reformalar tıimdi atqarylǵanyn atap ótti.
Onyń aıtýynsha, Tuńǵysh Prezıdenttiń pármenimen jabylǵan ıadrolyq polıgon Qazaqstandy «beıbitshilik aımaǵyna» aınaldyryp, elimiz álemdegi antııadrolyq qozǵalystyń lıderi atandy.
«N. Nazarbaev kópultty Qazaqstandy barsha qazaqstandyq qoǵam úshin turaqtylyq pen kelisim faktoryna aınaldyrdy. Tek Nursultan Ábishuly ǵana tarıhı ólshemmen alǵanda asa qysqa ýaqyt ishinde tabysty saıası, ekonomıkalyq jáne áleýmettik memleketke aınaldyrdy. Prezıdent arqasynda júzege asqan qazaqstandyq jol modeli álemniń kóptegen damýshy elderi úshin úlgige aınalyp otyr», - dedi Memlekettik hatshy.
