N. Nazarbaev búgingi kúni antııadrolyq álemdik qozǵalysty basqarýǵa daıyn ári laıyqty tulǵa - QR Parlamenti Májilisiniń vıtse-spıkeri J.Káribjanov
áýirdiń 19-y. QazAqparat /Qanat Mámetqazyuly/ - N. Nazarbaev búgingi kúni antııadrolyq álemdik qozǵalysty basqarýǵa daıyn ári laıyqty tulǵa.
Búgin QR Parlamenti Májilisinde «Qazaqstan-beıbitshilik eli» atty taqyrypta ótken dóńgelek ústel barysynda Májilis Tóraǵasynyń orynbasary Jánibek Káribjanov osylaı málim etti, dep habarlaıdy QazAqparat.
«Qazaqstan men onyń Prezıdenti N. Nazarbaev óziniń ustanǵan saıasatynyń arqasynda ıadrolyq qarýǵa qarsy álemdik saıasattyń kóshbasshysyna aınalyp otyr. Buǵan dálel retinde taıaýda ǵana elimizge resmı saparmen kelip ketken BUU Bas hatshysy Pan Gı Mýnnyń pikirin keltirsek te jetkilikti. Bas hatshy barlyq elderdi Qazaqstannan úlgi alýǵa shaqyryp, bul rette Prezıdent N. Nazarbaevqa jahandyq antııadrolyq qozǵalysty basqarý týraly usynys jasady. Menińshe, bul óte oryndy usynys. N. Nazarbaev búgingi kúni bundaı álemdik qozǵalysty basqarýǵa ábden daıyn ári laıyqty tulǵa», dedi J. Káribjanov.
Májilis Tóraǵasy orynbasarynyń aıtýynsha, bundaı usynystyń ózi Memleket basshysynyń beıbitshilik jolynda sińirip otyrǵan eńbeginiń joǵary deńgeıde baǵalanǵanyn bildiredi.
