N.Nazarbaev: Bizdiń batyrlar men oıshyldar - álem elikteýge laıyq tulǵalar
QR Prezıdentiniń jazýynsha, qazirgi zamandaǵy halyqtardyń tarıhı tanym-túısiginde kıno óneri erekshe oryn alady. Jalpy halyqtyń sanasynda fılmderdegi jarqyn kınoobrazdar irgeli ǵylymı monografııalardaǵy derekti portretterden góri mańyzdyraq ról atqarady.
«Sondyqtan, tez arada Qazaqstannyń órkenıet tarıhynyń úzdiksiz damýyn kórsetetin derekti-qoıylymdyq fılmderdiń, televızııalyq serıaldar men tolyqmetrajdy kórkem kartınalardyń arnaıy tsıklin óndiriske engizý kerek. Atalǵan jobalar keń halyqaralyq yntymaqtastyq aıasynda otandyq jáne sheteldik úzdik stsenarısterdi, rejısserlerdi, akterlerdi, prodıýserlerdi jáne zamanaýı kıno óndirisiniń basqa da mamandaryn tartý arqyly júzege asyrylýǵa tıis»,- dep atap ótedi Elbasy.
Memleket basshysy qyzyqty ári melodramalyq saryndarmen qatar, kórermender úshin tanymal fentezı jáne shytyrman oqıǵaly blokbasterlerdiń elementterin qosa otyryp, jańa tarıhı tele-kıno týyndylardyń janrlaryn barynsha keńeıtý qajettigin de atap ótedi.
«Osy maqsatpen Uly dalanyń baı mıfologııalyq jáne folklorlyq materıaldaryn paıdalanýǵa bolady. Ult qaharmandaryn úlgi tutý úrdisin qalyptastyrýǵa jol ashatyn sapaly balalar fılmderi men mýltıplıkatsııalyq serıaldardy asa qajet etetin óskeleń urpaqtyń da talǵamyna erekshe nazar aýdarý kerek. Bizdiń dańqty batyrlarymyz, oıshyldarymyz ben el bıleýshilerimiz - tek Qazaqstan ǵana emes, sondaı-aq, búkil álem boıynsha elikteýge laıyqty tulǵalar»,- dep túıindeıdi oıyn Nursultan Nazarbaev.
Aıta keteıik, Prezıdent atalmysh maqalasynda «Uly dalanyń kóne saryndary» jınaǵyn basyp shyǵarýdy usynǵan bolatyn. Elbasy sondaı-aq, «Uly dala» atty ejelgi óner jáne tehnologııalar mýzeıin ashý kerektigin aıtty.
