N.Nazarbaev Bilim jáne ǵylym mınıstrligine jáne alaty ákimdigine stýdentter úshin arzan jataqhanalar salý máselesin qarastyrýdy tapsyrdy
ASTANA. 12 mamyr. QazAqparat - Elbasy Nursultan Nazarbaev Bilim jáne ǵylym mınıstrligine Almaty ákimdigimen birlese otyryp, stýdentter úshin arzan jataqhanalar salý máselesin qarastyrýǵa tapsyrma berdi,
dep habarlady Memleket basshysynyń baspasóz qyzmeti Almatydaǵy keńes qorytyndysy boıynsha.
Búginde qalanyń 20 myńǵa tarta stýdentteri jataqhanamen qamtamasyz etilmegen, olar páter jaldaýǵa májbúr, joǵary oqý oryndarynyń kózinen tasa qalǵan. Qolda bar jataqhanalar shamadan tys tolǵan. Kóptegen jataqhanalar 60-shy jyldary salynǵan, kópshiligi kúrdeli jóndeýdi qjet etedi. Joǵary oqý oryndary, ásirese jeke menshiktegiler jyl saıyn oqytý aqysyn kóbeıtýde, alaıda óz stýdentterine qalypty turǵyn jaı-turmystyq jaǵdaılar jasaýdy esten shyǵarǵan. «Biz olardy qanshalyqty tárbıeleımiz, patrıotızmdi, otanǵa súıispenshilikti qalaı darytamyz, - bolashaq soǵan baılanysty. Ótken elektoraldyq kezeńde qala jastary, stýdentter qaýymy ózderiniń joǵary azamattyq belsendiligin kórsetti. Ákimdik jáne «Nur Otan» partııasynyń qalalyq fılıaly jas adamdardyń kúsh-jigerin jasampazdyqqa baǵyttaýy, olardyń problemalaryn sheshýleri tıis», - dep atap ótti Nursultan Nazarbaev.
Budan basqa Memleket basshysy Azıadaǵa qalada kóptegen álemdik deńgeıdegi sport nysandary salynǵanyn atap ótti. Olar halyqtyń keń jikteri úshin, eń aldymen balalar, jastar, stýdentter úshin qoljetimdi bolýy tıis.
Prezıdent ákimdikke bul nysandar qalaı tıimdi paıdalanylýyna baqylaý ornatyp, olarǵa kirý aqysy qoljetimdi bolýyn qamtamasyz etýge, joǵary oqý oryndarymen jumys isteýge tapsyrma berdi.
