N.Nazarbaev Aýǵanstan halqyn qarý emes, eńbek quraldaryna úıretý qajettigin aıtty
ASTANA. 25 sáýir. QazAqparat - Qazir Aýǵanstan halqyn eńbekke qaraı burý kerek.
Bul týraly búgin Astanada ótip jatqan Eýrazııa medıa forýmynda Elbasy Nursultan Nazarbaev málim etti.
«Aýǵanstandaǵy halyqaralyq koalıtsııanyń mıssııasy óziniń maqsatyna tolyq jetken joq degen pikirlerdiń avtorlarymen kelispeımin. Qaýipsizdikke tóngen qater aıtarlyqtaı tómendep, aýyzdyqtaldy. Iá, aýǵandyq ishki retteýde problemalar bar, alaıda bul turǵyda ońtaıly ózgerister qalyptasty»,-dedi Memleket basshysy.
Osy oraıda Elbasy álemdik qoǵamdastyqty árqashan Aýǵanstan ekonomıkasyn damytýǵa negizdelgen sharalardy qabyldaýǵa úndep kele jatqanyn eskerip ótti.
Uzaq ýaqyttan beri Aýǵanstan eli soǵys taýqymetin tartyp kele jatqanyna toqtalǵan Elbasy, bul elde 30 jyl buryn turǵan adam qolynda qarýdan basqa eshteńe ustamaǵanyn ıaǵnı, eńbek quraldaryna mashyqtanbaǵanyn aıtty.
«Halyqtyń tómen deńgeıdegi bilimdiligin eskere otyryp, eń aldymen, qazir Aýǵanstan halqyn eńbekke qaraı burý kerek. Bul memlekettiń ekonomıkasyn qalpyna keltirýge kómektesý shart. Biz dál osy máselege nazar aýdarymyz. Ókinishke qaraı, bul turǵyda jetistikter eleýli emes»,-dep qadap aıtty N. Nazarbaev.
Sóz sońynda Prezıdent atalǵan problemany tıimdi sheshý úshin Qazaqstan halyqaralyq jańa alańdy uıymdastyrý boıynsha óziniń qyzmetin usynýǵa daıyn ekenin jetkizdi.
