N. Nazarbaev Astananyń shetindegi joldardyń sapasyn syn tezine aldy
ASTANA. 22 sáýir. QazAqparat - Memleket basshysy halyqtyń negizgi bóligi turatyn qalanyń bólikterine nazar aýdarýdy tapsyrdy. Bul týraly búgin Táýelsizdik saraıynda ótken Astanany budan ary qaraı damytýǵa arnalǵan jıynda Memleket basshysy Nursultan Nazarbaev aıtty.
«Sońǵy úsh jylda joldardy jóndeý men qurylysyna 100 mlrd. teńgeden astam qarjy bólindi. Alaıda, joldardyń sapasy tómen. Eger de qazir «Astana» telearnasyn qossańyzdar, onda elorda shetindegi adamdardyń oıdym-oıdym shuńqyrlardan qozǵalysy qıyndap otyr. Ortalyqta jaqsy, ásirese, men júretin, basshylyq júretin joldar jaqsy»,-dep synady Prezıdent.
Osy oraıda Memleket basshysy halyqtyń negizgi bóligi turatyn qalanyń bólikterine nazar aýdarý kerektigin qadap aıtty.
«Ár jyly kóktemnen keıin barlyq joldar nelikten shuńqyrlanyp qalady? Sebebi, bul qurylystyń sapasyna baılanysty. Bireýler osydan paıda taýyp, asfalt tósemi men jol qurylysy sapasyz boldy»,-dep eskerip ótti N. Nazarbaev.
«Men bastapqydan qalaǵa 4-5 jolaqty joldar salý kerektigin aıtyp keldim. Biraq,ta eki jolaqty joldardyń qurylysyn jalǵastyrýdamyz. Eger qazirdiń ózinde osyndaı kólik keptelisteri baıqalyp jatsa, onda EKSPO kezinde ne bolady eken? Atalǵan kórmede 3 aıdyń ishinde bizge 5 mıllıon nemese odan da kóp adamdar keledi»,-dedi Memleket basshysy.
Sóz sońynda Prezıdent jol logıstıkasynda problemalar bar ekenin, negizgi kóliktik arnalardyń júktemesi artyp otyrǵandyǵyn atap ótti. «Jańa kópirlerdiń qurylysynyń jospary bar jáne men olardy qoldaımyn. Osy jobalardy júzege asyraıyq»,-dep túıdi Elbasy.
