N. Nazarbaev: «Astana Opera» - Ortalyq Azııadaǵy eń úlken óner shańyraǵy

Bul týraly .Aqordanyń baspasóz qyzmetinen habarlady.

Kópshilikke arnaǵan sózinde Qazaqstan Prezıdenti biregeı «Astana Opera» klassıkalyq opera jáne balet teatrynyń ashylýymen quttyqtap, bul elordanyń 15 jyldyǵyna baǵa jetpes tartý ekenin atap ótti.

- Eń aldymen, men sáýletshiler men qurylysshylarǵa alǵys aıtamyn. Jańa teatr - Ortalyq Azııadaǵy eń úlken óner shańyraǵy. Bul - búkil eýrazııalyq keńistiktegi sońǵy birneshe onjyldyqta salynǵan keń aýqymdy birden-bir klassıkalyq teatr. Bul - álemdegi tehnıkalyq jaǵynan eń jetildirilgen teatrlardyń biri. Osy tarıhı sát álemdik opera óneriniń jylnamasyna enedi. Ǵalamat «Astana Opera» ǵımaraty qazirdiń ózinde elimizdiń tarıhyna jazyldy. Onyń kúmbezi astynda men «Qazaqstan - 2050» Strategııasyn jarııa etkenimdi bilesizder. Onda mádenıet bizdiń ultymyzdyń genetıkalyq kodynyń ajyramas bóligi bolyp belgilendi, - dedi Memleket basshysy.

Nursultan Nazarbaev elimizde Qazaqstannyń daryndy halqynyń shyǵarmashylyq áleýetin ashýy úshin barlyq jaǵdaı jasalǵanyna toqtaldy.

- Táýelsizdik jyldary Qazaqstan mádenıetiniń naǵyz qaıta órleý dáýirine aınaldy. Osy ýaqyt ishinde mádenıet mekemeleriniń jelisi keńeıdi. Búginde olardyń 41-i respýblıkalyq jáne jeti myńnan astamy jergilikti uıymdar, olarda 75 myń adam jumys isteıdi. 2012 jyly memlekettiń mádenıet salasyna bólgen shyǵysy 35 mıllıard 500 mıllıon teńgeden asty. Meniń tapsyrmammen Astanada Qazaq ulttyq murajaı salynýda. Búginde Qazaqstan mádenıeti jahandyq mádenı muranyń tanymal bóligine aınalýǵa tıis. Bul qazirgi zamanǵy ónerdiń barlyq túrine - mýzyka, teatr, kıno, ádebıet, sýret ónerine qatysty. Bul úshin bolashaqta ótetin EKSPO-2017 halyqaralyq kórmesin, sondaı-aq ózge is-sharalar men álemdik deńgeıdegi forýmdardy paıdalaný kerek, - dedi Qazaqstan Prezıdenti.

Memleket basshysy elimizdiń eleýli artyqshylyqqa ıe ekenin atap ótti.

- Biz jańa elmiz, Astana - jańa elorda. Álemniń túkpir-túkpirinen bizdiń mádenıetimizben, dástúrimizben, tarıhymyzben tanysýǵa mıllıondaǵan adamdardyń yqylas bildirýi ábden tabıǵı nárse. Biz osy artyqshylyqty paıdalanýymyz kerek! Zaýyttar men joldar salyp jatqan elimiz birneshe jylǵa aldyn ala negiz qalaýda. Mektepter men aýrýhanalar turǵyzyp jatqan elimiz ultymyzdyń onjyldyqtaǵy kelesheginiń qamyn jasaýda. Teatrlar salyp jatqan elimiz aldaǵy ǵasyrlarǵa búginniń bıiginen qaraýda, - dedi Nursultan Nazarbaev.

Qazaqstan Prezıdenti sanaýly kúnderden keıin respýblıkamyz elordanyń 15 jyldyq mereıtoıyn atap ótetinin de aıtty.

- Biz Otanymyzdy alyp shaharmen baıyta tústik. Jarqyn da ásem jańa elorda Otanymyz úshin jarqyn bolashaqtyń jarshysyna aınaldy. Búginde Astanada da, Qazaqstannyń búkil óńirinde de, júzden astam etnos ókilderi turyp jatyr. Bul - kún saıyn qonys toıy, kún saıyn mereke, toılar ótetin qala - on myńdaǵan qonys ıeleriniń, jańa otbasylar men jańa taǵdyrlardyń qalasy. Mine, biz turǵyzǵan Astana men jańa Qazaqstannyń negizi - beıbit ómir jáne kelisim! Qazaqstandyqtardyń eńbegi men shyǵarmashylyǵy arqasynda jyldan-jylǵa elimiz nyǵaıa jáne jańara túsýde. Elordamyz ǵasyrdan-ǵasyrǵa órkendeı bersin! Beıbitshilik pen bereke-birlik árqashan jasampaz Qazaqstan halqymen birge bolsyn! Merekelerińizben! Sizderdi «Astana Opera» jańa mádenıet ordasynyń ashylýymen quttyqtaımyn, - dedi Memleket basshysy.

Operanyń jańa qoıylymyn qoıǵan - rejısser ıÝrıı Aleksandrov. Basty rólderde opera sahnasynyń juldyzdary - Nurjamal Úsenbaeva (QR halyq ártisi) men Ahmed Agadı (Reseıdiń eńbek sińirgen ártisi, Tatarstannyń halyq ártisi) oınady.

Bıyl Qazaqstan uly kompozıtor Muqan Tólebaevtyń týǵanyna 100 jol tolýyn atap ótýde. Onyń shyǵarmashylyǵy qazaqtyń halyq mýzykasyn eýropalyq úlgidegi álemdik mýzyka mádenıetiniń jetistikterimen etene baılanystyrýǵa baǵyttalǵan.