N.Nazarbaev Astana kelbetinen ár ýaqytta da erekshe sezimge bólenedi
ASTANA. QazAqparat - Búgin otandyq telearnalarǵa suhbat bergen QR Prezıdenti Nursultan Nazarbaev Astana kelbetinen ár ýaqytta da erekshe sezimge bólenetindigin aıtty.
«Astanaǵa kóz salǵan ár sátimde de erekshe sezimge boı aldyramyn, tipti óz kózime ózim senbeımin desem de bolady. Mine, osy qazir biz otyrǵan jerde 2004 jyly qamys qaýlaı ósip turǵan edi. Esildiń burylar tusy, Aqorda turǵan jer batpaq, adam boıynan asatyn qamys ósken jáne ıen dala, eshteńe joq edi. Shaǵyn ǵana ushaqtar qonatyn kishkentaı ǵana áýejaıy bar bolatyn. Al qazir qarańyzdarshy, túnde kele jatsań barlyǵy da samaladaı jarqyrap tur. Ushaqpen tóńirekti sholyp shyqsam, qalanyń tóńiregi jaıqalǵan ormanǵa aınalǵan», - dedi Elbasy. Memleket basshysy elordanyń boı túzeýine, Qazaqstannyń damýyna óziniń zor úles qosqanyn atap ótti. «Biz osy jyldardyń ishinde múldem jańa Qazaqstandy qurdyq, jańa býyn jasadyq», - dedi QR Prezıdenti.
