N.Nazarbaev: Anda-sanda tabanǵa tas batpasa, dańǵyl joldyń qadiri de bilinbeıdi

ASTANA. QazAqparat - Qazirgi qıynshylyqty tabanǵa batqan kishkentaı qıyrshyq tastar dep baǵalaıyq. Bul týraly búgin Astanadaǵy Táýelsizdik saraıynda ótken Indýstrııalandyrý kúni aıasyndaǵy jıyn barysynda Elbasy Nursultan Nazarbaev aıtty.

«Qurmetti otandastarym! Turaqty damý degen bizge joǵarydan bireý salyp bergen budyrsyz dańǵyl jol emes. Eshkimniń bizge syılyǵy emes. Ártúrli kedergiler men qıyndyqtar kezdesip otyrýy zańdylyq. Ómir solaı. Ómir ońaı emes. Ómir - kúres. Ómir - báseke. Ár adamǵa, ár elge, ár memleketke jeńiske jetý úshin sol kúresterde jeńý qajet. Tek qana jaqsyǵa kenelip úırengen jan ol jaqsylyqty baǵalamaıdy. Anda-sanda tabanǵa tas batpasa, dańǵyl joldyń qadiri de bilinbeıdi. Sondyqtan da qazirgi qıynshylyqty sol tabanǵa batqan kishkentaı qıyrshyq tastar dep baǵalaıyq», - dedi N.Nazarbaev.

Osy rette Elbasy eń bastysy birligimizge bekem bolyp, tatýlyqty tý ete bilý kerektigin basa aıtty.

«Árbir adam turaqtylyqtan aınymaı, qoǵamdyq kelisimdi tuǵyr ete bileıik. El birligi eshqashan quny túspeıtin, jyl ótken saıyn mańyzy artyp, máni tola túsetin sheksiz baılyq bolyp sanalady. Sol baılyqty kórkeıte bereıik»,- dedi QR Prezıdenti.