N. Nazarbaev agrarshylardy ozyq tehnologııalar men jumystyń zamanaýı tásilderin belsene qoldanýǵa shaqyrdy

ASTANA. QazAqparat - Memleket basshysy Nursultan Nazarbaev Soltústik Qazaqstan oblysynyń kásipkerlerimen jáne aýyl sharýashylyǵy taýarlaryn óndirýshilerimen kezdesti, dep habarlady Aqordanyń baspasóz qyzmeti.

Kezdesý aldynda Memleket basshysy «Kýtýzovka-Alıbı» JShS alqaptarynda egilgen astyqtyń jaǵdaıymen jáne óńirdegi aýyl sharýashylyǵy ónimin óndirýshiler óndirgen ónimderdiń úlgilerimen tanysty. Bıyl oblystaǵy aýyl sharýashylyǵy daqyldary egistigi 4,3 mıllıon gektar boldy, al salaǵa bólingen sýbsıdııalar shamamen 17 mıllıard teńgege jetti.

Áńgime barysynda Qazaqstan Prezıdenti barlyq ózgeristerden habardar bolý úshin jumysynyń asa qaýyrttyǵyna qaramastan elimizdiń aýyl sharýashylyqty oblystaryn aralaýǵa ýaqyt tabatynyn aıtty.

Nursultan Nazarbaev qazirgi ýaqytta memleket agrarlyq sektorǵa jan-jaqty qoldaý kórsetip otyrǵanyn atap ótti.

- Agrarlyq sektordy damytýdyń 2020 jylǵa deıingi baǵdarlamasy iske qosyldy. Onyń negizgi baǵyttarynyń biri - aýyl sharýashylyǵyndaǵy eńbek ónimdiligin arttyrý. Bul óte mańyzdy jáne aýqymdy jumys, - dedi Memleket basshysy.

Áńgime barysynda aýa raıy dál osyndaı Kanadada gektarynan 20-25 tsentner astyq jınalatyny, al Qazaqstanda ortasha astyq shyǵymy 15 tsentnerden aspaıtyny da aıtyldy. Nursultan Nazarbaev agrarshylardy ozyq tehnologııalar men jumystyń zamanaýı tásilderin belsene qoldanýǵa shaqyrdy.

Qazaqstan Prezıdenti udaıy kóńil bólýdi qajet etetin taǵy bir mańyzdy másele retinde aýyl sharýashylyǵy ónimderin óńdeý salasyn damytýdy atady.

- Biz bıdaıdy unǵa aınaldyramyz, endi ary qaraı júrip, makaron jáne basqalaryn óndirý kerek, ıaǵnı ónimderimizdiń qosymsha qunyn arttyrýdy oılaý qajet. Qazir Keden odaǵy aıasynda qazaqstandyq óndirýshilerdiń aldynan orasan múmkindikter ashylýda, muny paıdalana bilý kerek. Taıaý ýaqyttarda otandyq ónimderdi Iran arqyly Parsy shyǵanaǵyna shyǵarýǵa jol ashylady. Sondyqtan bizge eksportqa baǵdarlanǵan ónimderdi kóbirek óndirý kerek,- dedi Nursultan Nazarbaev.

Memleket basshysy mal sharýashylyǵy salasyn da damytýdyń qajettigine nazar aýdardy.

- Egin egip, jınap alǵan ońaı, biraq biz bir tonna et óndirisi bir tonna astyq óndirisinen bes ese tıimdi ekenin de oılaýǵa tıispiz. Bul qysy-jazy jumys isteıtin aýyl eńbekkeriniń jumyspen qamtylýy men tabysynyń ósýine yqpal etedi, - dedi Qazaqstan Prezıdenti.

Sonymen qatar áleýmettik salany damytý máselesi de qozǵaldy. Memleket basshysy agrokásiporyndardyń basshylaryn aýyl turǵyndary da qala turǵyndary sekildi joǵary áleýmettik mártebege ıe bolýy úshin qajetti nárseniń bárin jasaýǵa shaqyrdy.

Kezdesý barysynda Soltústik Qazaqstan oblysynyń ákimi E.Sultanov Qazaqstan Prezıdentine óńirdegi aýyl sharýashylyǵynyń damýy men jıyn-terin naýqanyn ótkizýge daıyndyq týraly baıandady.

Óńirdegi agrarlyq sala ókilderi Nursultan Nazarbaevqa aýyl sharýashylyǵyna memlekettiń kórsetip otyrǵan qoldaýy úshin alǵystaryn aıtty.