N.Nazarbaev 1991 jyly-aq Reseı men Ýkraınany janjaldan saqtanýǵa shaqyrǵan
ASTANA. QazAqparat - 1991 jyly Qazaqstan Prezıdenti Nursultan Nazarbaev Reseı men Ýkraınany eki el arasynda týyndaýy múmkin janjaldan saqtanýǵa shaqyrǵan. Elbasy Nursultan Nazarbaevqa qatysty mundaı derek «Habar» arnasyndaǵy «Nazarbaevpen eń bastylar jaıly...» atty derekti suhbatta málim boldy.
Derekti suhbat barysynda 1991 jyly jazylǵan Qazaqstan Prezıdentiniń suhbatynan úzindi kórsetildi. Onda N.Nazarbaevtyń Reseı men Ýkraına arasyndaǵy janjaldyń oryn alýy yqtımaldyǵy jaıynda aıtyp, baýyrlas elderge barynsha abaı bolýǵa shaqyrǵandyǵy kórsetildi.
Bul rette Qazaqstan Prezıdenti atalǵan eki eldiń halqy arasynda eshqandaı kózqaras qarama-qaıshylyǵy joq ekendigin basa aıtyp, tek jaýapsyz saıasatkerler ǵana janjal otyn tutandyrýy múmkin ekendigin eskertedi.
«1991 jyl óte qıyn kezeń bolatyn. Barlyǵy qaıda bet alaryn bilmeıtin, respýblıkalar arasynda teke-tires bar bolatyn. Eń birinshi kezekte Ýkraına tipti, konfederatsııa ıdeıasyn da qoldamaǵan edi. Biz Novo-Ogarevoda bas qosyp, máselelerdi talqylaǵan kezimizde Ýkraına prezıdenti ár ýaqytta: «Men ketýim kerek, aqyldasýym kerek», deıtin. Sondyqtan, esh sheshim qabyldaı almadyq. Reseı Prezıdenti Eltsın: «Eger Ýkraına bolmasa, onda biz ne jaıynda sóz qozǵaımyz», deıtin. Mine, osymen bári aıaqtalatyn. Sondyqtan, men munyń sońy janjalǵa aparyp soqpaýy úshin aıtqan edim. Ókinishke oraı, sońynda solaı boldy da», - dedi N.Nazarbaev.
