N. Mandela ómiriniń 67 jylyn beıbitshilik, gýmanızm jáne adam quqyǵy úshin kúreske arnaǵan
BUU Bas Assambleıasy Ońtústik Afrıka Respýblıkasynyń burynǵy Prezıdentiniń beıbitshilik pen bostandyq jáne adam quqyǵy isterine qosqan úlesin joǵary baǵalap, 2009 jyly 10 qarasha kúni 18 shildeni - Halyqaralyq Nelson Mandela kúni dep jarııalaǵan bolatyn.
Óıtkeni 18 shilde - Nelson Mandelanyń týǵan kúni.
Halyqaralyq Nelson Mandela Qory jyl saıyn 18 shilde kúni árbir adamdy basqa adamǵa kómektesýge 67 mınýt ýaqytyn jumsaýǵa shaqyrady. Qor jyl saıyn 18 shilde kúni «67 mınýt kómek» aktsııasyn ótkizip turady.
Óıtkeni Nelson Mandela - ómiriniń 67 jylyn beıbitshilik, gýmanızm, azattyq jáne adam quqyǵy isterine jumsaǵan adam.
Aparteıda (násildik kemsitýshilik) rejımine qarsy kúres jolynda Nelson Mandela ómiriniń 27 jylyn túrmede ótkizgen. Kóp jyldar jalǵyz adamdyq kamerada ómir súrdi. Osy jyldar ishinde onyń esimi búkil álemge tanyldy. Túrmede otyryp ol, London ýnıversıtetiniń zań fakýltetin syrttan oqý baǵdaralmasy boıynsha bitirip, zań ǵylymdarynyń bakalavry atandy.
1990 jyly túrmeden bosaǵan soń, kezinde ózi múshe bolǵan Afrıkalyq ulttyq kongress uıymyn basqardy.
1993 jyly Nobel syılyǵynyń laýreaty atandy.
Al 1994 jyly ótken jalpy ulttyq saılaýda Mandela tuńǵysh ret Ońtústik Afrıka Respýblıkasynyń qara násildi Prezıdenti bolyp saılandy.
1999 jyly memlekettik isterden óz erkimen bosaǵan soń, qoǵamdyq isterge belsene aralasa bastady. Qaıyrymdylyq sharalar uıymdastyrdy. El aralap, gýmanızm taqyrybynda lektsııalar oqydy.
2013 jyly 5 jeltoqsanda 95 jasynda dúnıeden ozdy.
Birikken Ulttar Uıymy da bul kúni árbir adamdy bala kútý, turmysy nasharlarǵa járdemdesý, ash-jalańash júrgenderdi tamaqtandyrý, qorshaǵan ortany tazartý nemese aýrýhanaǵa baryp naýqastarǵa kómek kórsetý sekildi izgi de qaıyrymdy istermen aınalysýǵa shaqyrady.