N. Qapparov: Memleket JEK qondyrǵylaryn satyp alǵandardyń shyǵynyn elý paıyzǵa deıin óteıtin bolady

Bul týraly búgin QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine jańartylatyn energııa kózderin paıdalanýdy qoldaý máseleleri boıynsha ózgerister men tolyqtyrýlar engizý týraly» zań jobasyn talqylaý barysynda málim boldy.

Qorshaǵan ortany qorǵaý mınıstri Nurlan Qapparovtyń aıtýnysha, zań jobasymen «ataýly kómek» uǵymy naqtylanatyn bolady. «Bul rette memleket bes kılovattan aspaıtyn jańartylatyn energııa qondyrǵylaryn satyp alǵan jeke paıdalanýshylardyń elý paıyz shyǵynyn óteıtin bolady. Qujattyń bul normasy Qazaqstanda jańartylatyn energııa kózderiniń óndirisin damytýǵa jáne otandyq óndirýshilerdiń naryǵyn qorǵaýǵa jaǵdaı jasaıtyn bolady. Bul kóbinese aýyl turǵyndary men fermerlik qojalyqtardy qoldaýǵa baǵyttalǵan», - dep atap ótti mınıstr.

Onyń sózine qaraǵanda, jeke paıdalanýshylar úshin jańartylatyn energııa kózderinen óndiriletin artyq elektr qýatyn jalpy paıdalaný jelisine satý boıynsha da jaǵdaı jasaý sharalary qarastyrylady. «Bunyń nátıjesinde memleket «jasyl» energetıkanyń jeke tutynýshlar arasynda jappaı taraýyna qol jetkizetin bolady», - deıdi mınıstr.