N.Erimbetov bastaǵan Respýblıkalyq qoǵamdyq komıssııanyń músheleri barlyq óńirde saılaýdyń ótý barysyn baqylaýda

N.Erimbetov, Astanada jýrnalısterge bergen suhbatynda, Respýblıkalyq qoǵamdyq komıssııanyń shtabtary barlyq oblystarda qurylǵandyǵyn jáne osy ýaqyttary olar el prezıdentiniń kezekten tys saılaýynyń ótý barysyn baqylap otyrǵandyǵyn málim etti. Saılaý barysyn shtabtardy basqarǵan belgili qoǵam qaıratkerlerimen birge, 5 myń erikti baqylaýda. «Ókinishke qaraı, olar saılaý ýchaskeleriniń tek 50 paıyzyn ǵana (respýblıka boıynsha barlyǵy 9 725 saılaý ýchaskesi quryldy) qamtı aldy. Degenmen, ózge otandyq jáne halyqaralyq baıqaýshylarmen únemi baılanys ustap otyrmyz», - dedi ol.

N.Erimbetov atap kórsetkendeı, túske deıin Astanada jáne ózge óńirlerde aıtýǵa turarlyqtaı saılaý zańnamasyn buzýlar bolǵan joq. «Degenmen, 15-ten astam saılaýshy shtabymyzǵa habarlasyp, ózderin tizimnen tappaı qalǵandaryn aıtyp shaǵymdandy. Onymen birge, qazir qosymsha tizim degen joq. Árıne, bul olardyń azamattyq ustanymdarynyń tómen bolýynyń saldary. Sebebi, ózderin saılaýshylar tizimine qosýǵa aldyn ala múmkindik boldy. Deı turǵanmen, munda qalalyq saılaý komıssııasynyń da kemistigi bar. Sebebi, Astana kóshi-qony joǵary qala», - dedi ol.

Qoǵamdyq komıssııa tóraǵasynyń sózine qaraǵanda, búgingi saılaýda astanalyqtardyń belsendiligi joǵary. Ol bul úrdisti el prezıdenttigine úmitkerler shtabtarynyń atqarǵan jaqsy jumysymen jáne Astana - ákimshilik qala bolǵandyqtan, memlekettik qyzmetkerlerdiń kóptigimen baılanystyrdy. Saılaý barysyn Astanada (barlyǵy 214 saılaý ýchaskesi bar) atalmysh komıssııanyń 13 múshesi baqylaýda. Olardyń qatarynda Tóregeldi Sharmanov, Murat Áýezov, Serik Bımýrzın, Ǵadilbek Shalahmetov, Vladımır Kochenov jáne basqalar bar.

«Almatyda, múmkin aýa raıynyń qolaısyzdyǵynan bolar, saılaýshylardyń saılaý ýchaskilerine kelýi tómen. Almatylyqtardyń belsendiligi tústen keıin oıana túsedi degen senimdemin», - dedi ol.

Komıssııa músheleri alǵashqy qorytyndy esepti saılaý aıaqtalǵannan keıin, saǵat 22.00-ge qaraı shyǵarýdy josparlap otyr.