N.Baıǵanın men Á.Moldaǵulovanyń jeke zattary Ulttyq mýzeıge tapsyryldy (FOTO)
ASTANA. QazAqparat - Búgin Aqtóbe qalasy Ǵ.Jubanova atyndaǵy oblystyq fılarmonııasynda «Ulttyq mýzeıge syı tartý» respýblıkalyq aktsııasy ótti.
Ulttyq mýzeıdiń aqparattyq-ımıdjdik qyzmetinyń habarlaýynsha, is-sharada sóz alǵan Aqtóbe oblysy ákiminiń orynbasary Asqar Sherııazdanov aktsııaǵa atsalysqan barlyq qatysýshylarǵa alǵys bildirdi.
«Bıyl Qazaqstan Respýblıkasynyń Táýelsizdigine 25 jyl tolyp otyr. Sondyqtan da «Ulttyq mýzeıge syı tartý» aktsııasy ulttyq ıdealogııany, onyń ishinde «Máńgilik el» ıdeıasyn qoldaý maqsatynda uıymdastyrylyp otyrǵan erekshe shara. Elimizdiń túkpir-túkpirinen jınalyp jatqan jádigerler qazaq tarıhynyń kýágeri ispetti. Onyń barlyǵy da keleshek urpaq úshin asa qajet. Aqtóbe oblysy ákimi atynan osy is-sharaǵa belsendi túrde qatysyp jatqan barlyq azamattarǵa alǵys bildiremin», - dedi A.Sherııazdanov.
QR Ulttyq mýzeıi qorlardy jınaqtaý, esepke alý jáne saqtaý qyzmetiniń basshysy Ryskúl Eskendirqyzy «Ulttyq mýzeıge syı tartý» aktsııasy týraly aıta kele, barlyq qatysýshylarǵa mýzeı dırektory Darhan Myńbaıdyń atynan alǵys hattar tabystady.
«Osydan bir jyl buryn bul aktsııa Astana qalasynan bastaý alǵan edi. Odan keıin atalmysh shara Almaty jáne Qyzylorda qalalarynda ótip, Ulttyq mýzeı qoryna myńnan astam jádiger tapsyryldy. Endigi kezek, mine, Aqtóbe óńirine kelip jetti. Nátıjesinde 300-ge jýyq jádiger jınaldy. Ulttyń rýhy, bolmys-bitimi, ata tanymy kóp nárseden bıik turady jáne onyń quny altynmen de, basqamen de ólshenbeıdi. Osy ıdeologııany boıyna sińirip ósken balalardan erteń namysty qoldan bermeıtin úlken azamattar shyǵady». - dedi R.Eskendirqyzy.
Qudaıbergen Jubanov, Nurpeıis Baıǵanın, Álııa Moldaǵulova, Marat Ospanov, Qadiráli Erjanovsyndy ultymyzdyń birtýar perzentteriniń urpaqtary qundy jádigerlerdi tabystasa, memleket jáne qoǵam qaıratkeri Amangeldi Aıtaly, QR bilim berý isiniń úzdigi Ǵalymjan Baıdarbes, aqtóbelik jas mıllıoner Marat Jaqsylyquly, mádenıet qaıratkeri Qaıyrǵalı Qojambaev, bokstan Azııa jáne Álem chempıony Galıb Djafarov, qazaqsha kúresten Azııa jáne Álem chempıony Baqtybaı Qısyqov, sambo jáne dzıýdo kúresinen Azııa jáne 2 márte Álem chempıony Raısa Baılıeva, gir kóterýden 12 márte álem chempıony Evgenıı Goncharov sekildi oblys maqtanyshtary Ulttyq mýzeı qoryna jeke zattaryn tapsyrdy.
Jádiger Kenbaı, Orynǵalı Haırýllın, Evgenııa Sýhotına, Marat Ǵabdrahmanov, Nurlan Jaqybaev, Maqsut Jahanov, Aleksandr Korvat, Bolat Atyraýbaev, Erqosaı Ábilov, Qaırat Noǵaev, Gúlden Aıazbaeva, Alekseı Vereşagın, Taımas Teleýishov sekildi talantty sýretshi-músinshiler mýzeıge shyǵarmashylyq týyndylaryn tartý etti.
Sonymen qatar, atalmysh aktsııaǵa jergilikti kásipkerler de belsendi túrde qatysty. Atap aıtsaq, «Dınar-Elektromash» JShS Ulttyq mýzeıge XVIII ǵasyrdyń ekinshi jartysyna jatatyn keli men kelsapty tapsyrdy.
Shara sońynda «Araıly Aqtóbe» folklorlyq ansambli ánnen shashý shashyp, myń buralǵan bıshiler kórermenniń qoshemetine bólendi.
Aıta keteıik, «Ulttyq mýzeıge syı tartý» aktsııasy 2015 jyly 18 naýryzda Qazaqstan Respýblıkasy Ulttyq mýzeıinde saltanatty túrde bastaý alǵan bolatyn. Aktsııaǵa qatysýshy óziniń kollektsııasyndaǵy qundy jádigerdi, el tarıhyna qatysty eleýli murany nemese elge belgili tulǵanyń qoldanǵan zattaryn mýzeıge saqtaýǵa tabystaıdy. Barlyq syı-tartýlarǵa zańdyq negizde qabyldap alý sharty jasalyp, olar Ulttyq mýzeıdiń qoryna ótkiziledi. Syı-tartýlar negizinde arnaıy kórme uıymdastyrylady.
