N. Ábdibekov: Elordanyń azyq-túlik beldeýin qurýdaǵy Qaraǵandy oblysynyń úlesi arta túsedi
ASTANA. QazAqparat - Elordanyń azyq-túlik beldeýin qurýdaǵy Qaraǵandy oblysynyń úlesi jyl saıyn arta túsedi, dedi óńir basshysy Nurmuhambet Ábdibekov.
«Astanany kókónispen qamtamasyz etemiz. Elorda naryǵyndaǵy Qaraǵandy oblysynyń kókónis kólemi jyl sanap artady dep oılaımyn», - dedi N. Ábdibekov Astanadaǵy aýyl sharýashylyǵy jármeńkesinde.
Ol aımaqta «QazAgromen» birlesip mal sharýashylyǵyn damytý sharalary qolǵa alynǵanyn atap ótti. «Bordaqylaý alańdary qurylady. Joba 12 myń bas iri qarany qarastyrady», - dedi óńir basshysy. Et ónimi de Astanaǵa jol tartady, dedi ol. Astana ákimi Imanǵalı Tasmaǵambetov elordanyń azyq-túlik beldeýin qamtamasyz etýde búginde kórshiles Aqmola jáne Qaraǵandy oblystarynyń múmkindigi joǵary dep esepteıdi.
«Birneshe jyl buryn ónim ımporty shamamen 72 paıyzdy qurasa, búginde bul kórsetkish 50-52 paıyzdy qurady», - dedi elorda basshysy. Osyǵan deıin habarlanǵandaı, 4 qazanda Astanada Qaraǵandy jáne Aqtóbe oblystarynyń aýyl sharýashylyǵy jármeńkesi ótýde. Qaraǵandylyqtar elordaǵa 800 tonnadan astam ónim, sonyń ishinde - 250 tonna kókónis, 450 tonna kartop, 60 tonna et ákeldi.
