MJÁ jobalaryna mindetti táýelsiz saraptama jasalady - Rýslan Dálenov
ASTANA. QazAqparat - Qazaqstanda memlekettik-jekeshelik áriptestik jobalaryna mindetti táýelsiz saraptama jasaý engiziletin bolady. Bul týraly búgin Senat depýtattarymen kezdesý barysynda QR Ulttyq ekonomıka birinshi vıtse-mınıstri Rýslan Dálenov málim etti, dep habarlaıdy QazAqparat tilshisi.
Kezdesý barysynda ol memlekettik-jekeshelik áriptestik jobalaryn júzege asyrý barysynda anyqtalǵan buzýshylyqtar jaıynda aıtyp berdi.
"Ótken jyldyń jeltoqsan aıynyń ortasynda jergilikti jerlerde MJÁ qalaı júzege asyrylyp jatqanyna saraptama júrgizdik. Eń aldymen birinshi jylǵy tólemniń qasaqana nemese kelisimshartqa qol qoıý arqyly keıinge qaldyrylýyn kórdik. Biz MJÁ bıýdjetti júktemeden aryltady deıtin bolsaq, onda bıýdjet mindettemesi de birkelki bolýy tıis", - dedi ol.
Sonymen qatar vıtse-mınıstr MJÁ jobasyn júzege asyrý barysynda tájirıbesi joq jeke áriptesti tańdaýda problema bar ekendigin atap ótti.
"Úshinshiden, tabystylyq normasynda aýytqý bolmaýy qajet. Biz birtutas memlekettik ómir súremiz jáne tabystylyq ta birdeı bolýy tıis. Tórtinshiden, qaryz stavkasynda úlken aýytqýshylyq bar ma, sony qaradyq. Stavkada aıtarlyqtaı aıyrmashylyq bolmaýy kerek",- dedi vıtse-mınıstr.
Onyń aıtýynsha, atalǵan buzýshylyqtarǵa baılanysty mınıstrlik zańnamaǵa túzetýler engizýge bastamashylyq jasaǵan.
"Biz barlyq jobalarǵa MJÁ ortalyǵynda, al jergilikti jerlerde ekonomıka basqarmalarynda mindetti táýelsiz saraptama jasaýdy usyndyq. Olar ózderiniń jobalaryna ózderiniń saraptamalaryn bermeýi qajet. Bul túzetýdi buıryǵymyzǵa engizetin bolamyz. Taıaý ýaqytta ol qabyldandy jáne ózine ózi saraptama jasaýǵa tyıym salynady. Ol úshin syrttan saraptama jasaıtyn uıym tartylatyn bolady",- dedi R.Dálenov.
